वाढदिवसाला सामाजिक बांधिलकीची जोड, महेश लुंकड यांच्या वाढदिवसानिमित्त रक्तदान शिबिर

21 जणांनी स्वयंस्फूर्तीने केले रक्तदान : उद्योगपती पारसमलजी लुंकड यांची प्रमुख उपस्थिती

महाराष्ट्र न्यूज नेटवर्क

पुणे : सीटीएस लॉजिस्टिक लिमिटेडचे डायरेक्टर तथा युवा उद्योगपती महेश लुंकड यांच्या वाढदिवसानिमित्त सामाजिक बांधिलकी जपत रक्तदान शिबिराचे आयोजन करण्यात आले. वाढदिवसाचा आनंद केवळ उत्सवापुरता मर्यादित न ठेवता समाजोपयोगी उपक्रमाच्या माध्यमातून साजरा करण्यात आल्याने या उपक्रमाचे सर्वत्र कौतुक होत आहे.

या रक्तदान शिबिराला उत्स्फूर्त प्रतिसाद मिळाला. 21 रक्तदात्यांनी स्वयंस्फूर्तीने रक्तदान करून महेश लुंकड यांना वाढदिवसाची अनोखी आणि संस्मरणीय भेट दिली.

रक्तदानासारख्या जीवनदायी उपक्रमातून वाढदिवस साजरा करण्याचा संदेश यानिमित्ताने देण्यात आला. शिबिराला दानशूर उद्योगपती पारसमलजी लुंकड यांची प्रमुख उपस्थिती होती.

त्यांनी रक्तदात्यांचे अभिनंदन करत अशा सामाजिक उपक्रमांची आज समाजाला मोठी गरज असल्याचे सांगितले. उपस्थितांनी महेश लुंकड यांना वाढदिवसाच्या शुभेच्छा देत त्यांच्या पुढील सामाजिक व व्यावसायिक वाटचालीसाठी शुभेच्छा दिल्या.

“रक्तदान हे सर्वश्रेष्ठ दानांपैकी एक आहे. आपल्या रक्ताच्या एका थेंबामुळे एखाद्या गरजू व्यक्तीचे प्राण वाचू शकतात. महेशच्या वाढदिवसानिमित्त 21 जणांनी स्वयंस्फूर्तीने रक्तदान करणे ही त्याच्यासाठी सर्वात मौल्यवान भेट आहे. वाढदिवसासारख्या आनंदाच्या प्रसंगी समाजासाठी काहीतरी करण्याची भावना प्रत्येकाने जपली, तर निश्चितच समाजात सकारात्मक परिवर्तन घडेल.” – पारसमलजी लुंकड, उद्योगपती