डीजे वाजवणाऱ्या मंडळाला दणका

न्यायालयाने सुनावली शिक्षा : खडक पोलिसांनी २४ तासांत दाखल केले दोषारोपपत्र

महाराष्ट्र न्यूज नेटवर्क

पुणे : ईद-ए-मिलादनिमित्त काढण्यात आलेल्या मिरवणुकीत साऊंड सिस्टिमचा वापर करून सर्वोच्च न्यायालयाने घालून दिलेल्या ध्वनीच्या मर्यादेचे उल्लंघन करून ध्वनिप्रदूषण केल्याच्या खटल्यामध्ये न्यायालयाने मंडळाचे अध्यक्ष, उपाध्यक्ष आणि साऊंड सिस्टिमचे मालक यांना शिक्षा सुनावली आहे. खडक पोलिसांनी २४ तासांच्या आत दोषारोपपत्र दाखल केल्याने हा खटला तात्काळ निकाली काढण्यात आला.

अल मदिना यंग बॉईज मंडळाचे अध्यक्ष वाहिद कासम मणियार व उपाध्यक्ष जायेद मजीद शेख (रा. लोहियानगर), डीजे साऊंड सिस्टिम ऑपरेटर व मालक प्रकाश कृष्णात अस्वले (रा. सावर्डे बुद्रुक, ता. कागल, जि. कोल्हापूर) अशी शिक्षा झालेल्यांची नावे आहेत.

२६ ऑगस्ट रोजी लोहियानगर कमानीजवळ सार्वजनिक रस्त्यावर येणाऱ्या-जाणाऱ्या नागरिकांना त्रास होईल, अशा प्रकारे गर्दी जमवून साऊंड सिस्टिमचा आवाज सर्वोच्च न्यायालयाने निर्धारित केलेल्या डेसिबलपेक्षा जास्त ठेवून वाजवला जात असल्याचे आढळून आले.

अनेक वेळा सांगून व नोटीस देऊनही त्यांनी साऊंड सिस्टिमचा आवाज कमी न केल्याने खडक पोलिसांनी तिघांविरुद्ध गुन्हा दाखल करून कारवाई केली.

शिवाजीनगर येथील प्रथमवर्ग न्यायदंडाधिकारी न्यायालयात २४ तासांच्या आत दोषारोपपत्र दाखल करण्यात आले होते. त्यानुसार न्यायालयाने अल मदिना यंग बॉईज मंडळाचे अध्यक्ष वाहिद कासम मणियार, उपाध्यक्ष जायेद मजीद शेख, डीजे साऊंड सिस्टिमचे ऑपरेटर व मालक प्रकाश कृष्णात अस्वले यांना शिक्षा सुनावली आहे.

ही कारवाई पोलीस उपायुक्त ऋषिकेश रावले यांच्या मार्गदर्शनाखाली खडक पोलीस ठाण्याचे वरिष्ठ पोलीस निरीक्षक धनंजय पिंगळे, पोलीस निरीक्षक शर्मिला सुतार, समाधान पवार, सहायक पोलीस निरीक्षक अमोल वळसंग, स्वप्नील बनकर, पोलीस हवालदार राजाराम गाढवे, पोलीस अंमलदार भूषण चव्हाण, कल्याण घोरपडे यांनी केली आहे.

अशी झाली शिक्षा – या खटल्यामध्ये भारतीय न्याय संहिता कलम २२३ नुसार, जर आदेश न पाळल्यामुळे कायदेशीर काम करणाऱ्या व्यक्तीला अडथळा, त्रास किंवा इजा होत असेल, तर सहा महिने कारावास किंवा अडीच हजार रुपये दंड, अशी शिक्षेची तरतूद आहे. या तिघांना न्याय संहिता कलम २२३ प्रमाणे प्रत्येकी १ हजार रुपये दंड, न्याय संहिता कलम २९२ नुसार प्रत्येकी ५०० रुपये दंड आणि दंड न भरल्यास एक दिवस अतिरिक्त कारावास, अशी शिक्षा सुनावण्यात आली आहे. ही दंडात्मक शिक्षा असली तरी आता या सर्वांवर शिक्षा झाल्याचा ठपका बसला आहे.