पुण्यात आठवड्यातून एक दिवस पाणीकपात

गुरुवारपासून संपूर्ण शहराचा पाणीपुरवठा बंद : पाणी जपून वापरण्याचे महापालिकेचे आवाहन

महाराष्ट्र न्यूज नेटवर्क

पुणे : राज्यातील दुष्काळी परिस्थितीच्या पार्श्वभूमीवर राज्य शासनाने पाणीपुरवठ्यात १० टक्के कपात करण्याचे आदेश दिल्यानंतर पुणे महापालिकेने महत्त्वपूर्ण निर्णय घेतला आहे. त्यानुसार येत्या गुरुवारपासून (दि. १५ ऑक्टोबर २०२६) पुणे शहराचा पाणीपुरवठा आठवड्यातून एक दिवस बंद ठेवण्यात येणार आहे. याबाबत पुणे महापालिकेच्या अतिरिक्त आयुक्त पवनीत कौर यांनी माहिती दिली आहे.

राज्यातील दुष्काळी परिस्थिती लक्षात घेऊन उपलब्ध पाणीसाठ्याचे योग्य नियोजन करण्यासाठी राज्य शासनाने पाणीपुरवठ्यात १० टक्के कपात करण्याचे निर्देश दिले आहेत.

त्यानुसार पाटबंधारे विभागाच्या आदेशानंतर पुणे महापालिकेने शहरात आठवड्यातून एकदा पाणीपुरवठा बंद ठेवण्याचा निर्णय घेतला आहे.

यामुळे पुणेकरांना आठवड्यातून एक दिवस पाणीकपातीचा सामना करावा लागणार आहे. उपलब्ध पाण्याचा काटकसरीने वापर करणे आणि पाण्याचे योग्य व्यवस्थापन करणे, हा या निर्णयामागील उद्देश आहे.

दरम्यान, पाणीपुरवठा बंद राहण्याच्या कालावधीत नागरिकांनी आवश्यकतेनुसार पाण्याचा साठा करून ठेवावा आणि पाण्याचा अपव्यय टाळावा, असे आवाहन महापालिकेने केले आहे.

बांधकामांसाठी पिण्याचे पाणी वापरण्यास बंदी – बांधकामासाठी पिण्याच्या पाण्याऐवजी एसटीपी प्रक्रियेद्वारे प्रक्रिया केलेले पाणी किंवा बोअरवेलचे पाणी वापरावे. सार्वजनिक आणि खासगी वाहन धुलाई केंद्रे बंद ठेवावीत. वाहन धुणे, अंगण व पदपथ स्वच्छ करणे, उद्याने आणि जलतरण तलावांसाठी पिण्याच्या पाण्याचा वापर करू नये. गृहनिर्माण सोसायट्यांनी बंद असलेले सांडपाणी प्रक्रिया प्रकल्प सुरू करून प्रक्रिया केलेल्या पाण्याचा वापर बागकाम आणि फ्लशिंगसाठी करावा. घरगुती नळ, फ्लश टाक्या आणि जलवाहिन्यांमधील गळती तातडीने दुरुस्त करावी. पाण्याच्या टाक्या ओव्हरफ्लो होणार नाहीत, याची काळजी घ्यावी. आंघोळ, भांडी आणि कपडे धुण्यासाठी आवश्यक तेवढेच पाणी वापरावे, असे आवाहन महापालिकेने केले आहे.