खंडणी उकळणारा पोलीस अंमलदार निलंबित

गुटखा विक्रेत्याकडून घेतली होती १ लाख ६५ हजारांची खंडणी : पोलीस उपायुक्तांची कारवाई

महाराष्ट्र न्यूज नेटवर्क

पुणे : फुरसुंगी परिसरातील गुटखा विक्रेत्याला कारवाईची भीती दाखवून ५ लाख रुपयांची खंडणी मागणाऱ्या आणि त्यापैकी १ लाख ६५ हजार रुपयांची खंडणी उकळणाऱ्या पोलीस अंमलदाराला पोलीस उपायुक्त जीवन बेनीवाल यांनी तडकाफडकी निलंबित केले आहे.

पोलीस अंमलदार रामकिशन धोंडिबा हंबर्डे असे निलंबित करण्यात आलेल्याचे नाव आहे. रामकिशन हंबर्डे आणि सतीश मोरे यांनी संगनमत करून गुटखा विक्रेत्याला कारवाई करण्याची धमकी देत ५ लाख रुपयांची मागणी केली.

त्यापैकी १ लाख ६५ हजार रुपये घेतल्याच्या आरोपावरून फुरसुंगी पोलीस ठाण्यात ११ ऑक्टोबर २०२६ रोजी गुन्हा दाखल करण्यात आला आहे.

तसेच, अवैध गुटख्यावरील कारवाईची भीती घालून एक किलो काजू-बदामही नेल्याबाबतची तक्रार सोशल मीडियावर व्हिडिओ क्लिप प्रसारित झाल्यानंतर निदर्शनास आली आहे.

फुरसुंगी पोलीस ठाण्याच्या वरिष्ठ पोलीस निरीक्षकांनी याबाबत अहवाल पाठविला. हे लक्षात घेऊन पोलीस दलातील अधिकारी व पोलीस अंमलदार यांच्या वर्तनाबाबत जनमानसात प्रश्न निर्माण होण्याची, तसेच पोलीस दलाच्या प्रतिमेवर प्रतिकूल परिणाम होण्याची शक्यता असल्याने पोलीस उपायुक्त जीवन बेनीवाल यांनी त्याला निलंबित केले आहे.

५ लाखांची खंडणी मागणाऱ्या दोघांवर गुन्हा दाखल – किराणा मालाच्या दुकानात गुटखा विक्रीप्रकरणी गुन्हा दाखल करण्याची धमकी देऊन ५ लाख रुपयांची खंडणी मागितल्याप्रकरणी पोलीस अंमलदारासह दोघांविरुद्ध फुरसुंगी पोलिसांनी गुन्हा दाखल केला आहे. पोलीस अंमलदाराने साथीदाराच्या मदतीने १ लाख ६५ हजार रुपये घेतल्याचे फिर्यादीत म्हटले आहे. पोलीस अंमलदार रामकिशन हंबर्डे आणि सतीश मोरे (रा. वडकी, हडपसर-सासवड रस्ता) यांच्याविरुद्ध गुन्हा दाखल करण्यात आला आहे. तक्रारदार किराणा माल व्यापाऱ्याचे हडपसर-सासवड रस्त्यावरील उरुळी देवाची परिसरात दुकान आहे. ८ ऑक्टोबर रोजी सकाळी पोलीस अंमलदार आणि त्याच्यासोबत असलेला एक आरोपी दुकानात आले. किराणा मालाच्या दुकानात गुटखा विक्री सुरू असून, या प्रकरणात गुन्हा दाखल करण्यात येईल, अशी धमकी त्यांनी दिली. त्यानंतर ५ लाख रुपयांची मागणी केली. त्यापैकी १ लाख ६५ हजार रुपये घेतले.