सायबर चोरट्यांकडून ज्येष्ठ महिलेची १४ लाखांची फसवणूक

सिनिअर सिटीझन कार्ड देण्याचे आमिष : मोबाईलवर पाठवली होती एपीके फाईल

महाराष्ट्र न्युज नेटवर्क

पुणे : सिनिअर सिटीझन कार्ड देण्याचे आमिष दाखवून एपीके फाईल पाठवत सायबर चोरट्यांनी एका ज्येष्ठ महिलेची १४ लाख २७ हजार रुपयांची फसवणूक केली आहे.

याबाबत फातिमा हिल्स परिसरात राहणाऱ्या एका ७२ वर्षीय महिलेने कोंढवा पोलिसांकडे फिर्याद दिली आहे. पोलिसांनी दिलेल्या माहितीनुसार, सायबर चोरट्यांनी १३ ऑक्टोबर रोजी महिलेच्या मोबाईलवर संपर्क साधला.

राष्ट्रीयीकृत बँकेचे अधिकारी असल्याची बतावणी करून बँकेकडून सिनिअर सिटीझन कार्ड देण्यात येणार असल्याचे त्यांनी सांगितले. त्यानंतर चोरट्यांनी महिलेच्या मोबाईलवर एपीके फाईल पाठवली.

ही फाईल उघडल्यानंतर चोरट्यांनी महिलेच्या मोबाईलचा तांत्रिक ताबा घेतला आणि बँक खात्याची गोपनीय माहिती मिळवली. त्यानंतर महिलेच्या बँक खात्यातून १४ लाख २७ हजार रुपये काढून दुसऱ्या खात्यात वळवण्यात आले. पोलीस उपनिरीक्षक तांबोळी या प्रकरणाचा तपास करीत आहेत.

शेअर बाजारात गुंतवणुकीच्या आमिषाने ३९ लाखांची फसवणूक – शेअर बाजारात गुंतवणूक केल्यास चांगला परतावा मिळेल, असे आमिष दाखवून सायबर चोरट्यांनी एका ज्येष्ठ नागरिकाची ३९ लाख ७४ हजार रुपयांची फसवणूक केल्याचा प्रकार उघडकीस आला आहे.

याबाबत हडपसरमधील काळेबोराटेनगर परिसरात राहणाऱ्या एका ७२ वर्षीय ज्येष्ठ नागरिकाने काळेपडळ पोलीस ठाण्यात फिर्याद दिली आहे.

पोलिसांनी दिलेल्या माहितीनुसार, सायबर चोरट्यांनी ज्येष्ठ नागरिकाच्या मोबाईलवर संपर्क साधून शेअर बाजारात गुंतवणूक केल्यास चांगला परतावा मिळेल, असे आमिष दाखवले.

त्यानंतर त्यांना मोबाईलमध्ये एक अॅप डाउनलोड करण्यास सांगितले. या अॅपच्या माध्यमातून गुंतवणूक योजनांची माहिती देण्यात आली.

चांगला परतावा मिळण्याचे आमिष दाखवून त्यांना जाळ्यात ओढण्यात आले. त्यानंतर ज्येष्ठ नागरिकाने तीन महिन्यांत वेळोवेळी चोरट्यांच्या खात्यात ३९ लाख ७४ हजार रुपये जमा केले.

चोरट्यांनी परतावा मिळत असल्याचे भासवले; मात्र प्रत्यक्षात कोणताही परतावा दिला नाही. त्यांनी पैसे काढण्याचा प्रयत्न केला असता, आपली फसवणूक झाल्याचे त्यांच्या लक्षात आले. पोलीस निरीक्षक अण्णासाहेब बाबर या प्रकरणाचा तपास करीत आहेत.