अंतर विभागीय हॉकी स्पर्धेचा खडकीत उत्साहपूर्ण शुभारंभ
महाराष्ट्र जैन वार्ता
पुणे : सावित्रीबाई फुले पुणे विद्यापीठ, पुणे क्रीडा विभाग आणि टिकाराम जगन्नाथ महाविद्यालय (स्वायत्त), खडकी यांच्या संयुक्त विद्यमाने ६ ते ९ नोव्हेंबर या कालावधीत सावित्रीबाई फुले पुणे विद्यापीठाच्या हॉकी स्टेडियमवर अंतर विभागीय हॉकी स्पर्धा (मुले-मुली) सुरू झाली.
उद्घाटन प्रसंगी बोलताना खडकी शिक्षण संस्थेचे अध्यक्ष कृष्णकुमार गोयल म्हणाले, “खेळामध्ये खेळाडूंनी सातत्य ठेवणे अत्यंत आवश्यक आहे. सातत्याने केलेले प्रयत्न कोणत्याही क्षेत्रात यश मिळवून देतात.” त्यांच्या या प्रेरणादायी भाषणाने स्पर्धेला उत्साहाची नवी झळाळी मिळाली.
या स्पर्धेत पुणे, नाशिक आणि अहिल्यानगर या तीन जिल्ह्यांतील विविध महाविद्यालयांचे संघ सहभागी झाले असल्याची माहिती क्रीडा संचालक डॉ. महेश बेंडभर यांनी दिली. या प्रसंगी खडकी शिक्षण संस्थेचे सचिव आनंद छाजेड, संचालक रमेश अवस्थे, काशिनाथ देवधर, प्राचार्य डॉ. संजय चाकणे, सावित्रीबाई फुले पुणे विद्यापीठाचे क्रीडा संचालक डॉ. सुदाम शेळके, महाराष्ट्र हॉकी फेडरेशनचे वरिष्ठ उपाध्यक्ष डॉ. मनोज भोरे, विद्यापीठाचे सिनेट सदस्य रमेश गायकवाड, पुणे जिल्हा विभागीय क्रीडा समितीचे सचिव अमेय काळे तसेच सदस्य दिनेश कराड उपस्थित होते.
कार्यक्रमाचे सूत्रसंचालन डॉ. अविनाश कोल्हे यांनी केले, तर आभार प्रदर्शन डॉ. सुदाम शेळके यांनी मानले.
