सराईत गुन्हेगाराकडून २ पिस्टल, २ काडतुसे जप्त

भारती विद्यापीठ पोलिसांची कामगिरी : मांगडेवाडीतील सुंदरनगर येथे कारवाई

महाराष्ट्र न्युज नेटवर्क

पुणे : मांगडेवाडी येथील सुंदरनगर परिसरात कमरेला दोन पिस्टल लावून फिरणाऱ्या सराईत गुन्हेगाराला भारती विद्यापीठ पोलिसांनी जेरबंद केले आहे.

सोहम गोविंद धुमाळ (वय १८, रा. पुण्यनगरी सोसायटी, कृष्णा इन्क्लेव्ह, वडगाव शेरी) असे अटक करण्यात आलेल्या आरोपीचे नाव आहे.

भारती विद्यापीठ पोलीस ठाण्यातील तपास पथकातील पोलीस अंमलदार मितेश चोरमोले, सागर बोरगे आणि अभिनय चौधरी यांना त्यांच्या बातमीदारामार्फत माहिती मिळाली होती की, मांगडेवाडी येथील सुंदरनगर परिसरात एक व्यक्ती अग्निशस्त्र घेऊन थांबली आहे. मिळालेल्या माहितीच्या आधारे पोलीस उपनिरीक्षक नीलेश मोकाशी व त्यांच्या सहकाऱ्यांनी सुंदरनगर येथे धाव घेतली.

गुरुदत्त मित्र मंडळाजवळील मोकळ्या जागेत एक संशयित व्यक्ती उभी असल्याचे पोलिसांना दिसून आले. पोलिसांना पाहताच तो पळून जाण्याचा प्रयत्न करू लागला. मात्र, पोलिसांनी त्याला ताब्यात घेतले. चौकशीदरम्यान तो कमरेच्या मागील बाजूस हात घालून काहीतरी लपविण्याचा प्रयत्न करत उडवाउडवीची उत्तरे देत होता.

त्याची झडती घेतली असता त्याच्याकडून १ लाख रुपये किमतीची दोन गावठी बनावटीची पिस्टल आणि दोन जिवंत काडतुसे जप्त करण्यात आली. याप्रकरणी भारती विद्यापीठ पोलीस ठाण्यात आर्म अ‍ॅक्टअंतर्गत गुन्हा दाखल करण्यात आला असून सहायक पोलीस निरीक्षक स्वप्निल पाटील पुढील तपास करत आहेत.

ही कारवाई अपर पोलीस आयुक्त राजेश बनसोडे, पोलीस उपायुक्त मिलिंद मोहिते, सहायक पोलीस आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक राहुल खिलारे, पोलीस निरीक्षक कैलास कोडग, सहायक पोलीस निरीक्षक स्वप्निल पाटील, पोलीस उपनिरीक्षक नीलेश मोकाशी, पोलीस अंमलदार मितेश चोरमोले, अभिनय चौधरी, सागर बोरगे, सचिन सरपाले, महेश बारवकर, मंगेश पवार, निलेश खैरमोडे, मंगेश गायकवाड, किरण सावळे, तुकाराम सुतार आणि संदीप आगळे यांनी केली.

खुनाच्या भीतीतून बाळगले पिस्टल
सोहम धुमाळ हा अल्पवयीन असताना एका खुनाच्या गुन्ह्यात सहभागी होता. त्या प्रकरणात त्याच्यावर खुनाचा गुन्हा दाखल करण्यात आला होता. अल्पवयीन असल्याने त्याला अटक करण्यात आली नव्हती. त्या खुनानंतर विरोधी टोळीतील गुंड आपल्यावर हल्ला करतील किंवा “गेम” करतील, अशी भीती त्याला वाटत होती. त्यामुळे स्वतःच्या सुरक्षेसाठी त्याने ही पिस्टल बाळगल्याची माहिती त्याने पोलिसांना दिली.