विवाहितेची गळफास घेऊन आत्महत्या

अधिक मासात सोन्याची अंगठी न दिल्याने केला होता छळ : चंदननगर पोलिसांनी पतीला केली अटक

महाराष्ट्र न्यूज नेटवर्क

पुणे : अधिक मासानिमित्त जेवायला बोलावून सोन्याची अंगठी देण्यास नकार दिल्याने विवाहितेचा छळ करण्यात आला. या छळाला कंटाळून विवाहितेने गळफास घेऊन आत्महत्या केली. आत्महत्येस प्रवृत्त केल्याप्रकरणी चंदननगर पोलिसांनी पतीला अटक केली आहे.

तेजस्विनी गोरख सोनवणे (वय २५, रा. विशाललीला सोसायटी, तुकारामनगर) असे विवाहितेचे नाव आहे. गोरख संभाजी सोनवणे (वय ३२, रा. विशाललीला सोसायटी, तुकारामनगर) असे अटक करण्यात आलेल्या पतीचे नाव आहे.

सासरे संभाजी सोनवणे (वय ६२) आणि सासू अलका सोनवणे (वय ५५) यांच्यावर गुन्हा दाखल करण्यात आला आहे. ही घटना जून २०२१ ते ३ जून २०२६ या कालावधीत घडली.

याबाबत अहिल्यानगर येथील तेजस्विनीच्या वडिलांनी चंदननगर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गोरख सोनवणे याच्याशी तेजस्विनी हिचा जून २०२१ मध्ये विवाह झाला होता.

लग्नानंतर माहेरहून वेगवेगळ्या कारणांवरून गोरख सोनवणे व त्याचे आई-वडील पैशांची मागणी करत होते. तेजस्विनीचे आई-वडील त्यांना जमेल तशी मदत करत होते.

कार आणि घर घेण्यासाठी माहेरहून सतत पैशांची मागणी करून तिचा शारीरिक व मानसिक छळ केला जात होता. यंदा अधिक मास असल्याने तेजस्विनीच्या आई-वडिलांनी जावई गोरख सोनवणे याला जेवणासाठी घरी बोलावले होते.

त्यावेळी अधिक मासाचे वाण म्हणून सोन्याची अंगठी पाहिजे, अशी गोरखने मागणी केली. मात्र, तिच्या आई-वडिलांनी पोशाख देऊन त्याचा मान ठेवला होता.

सोन्याची अंगठी न दिल्याने घरी आल्यानंतर तेजस्विनीचे जगणे असह्य करण्यात आले. त्यातून तिने ३ जून २०२६ रोजी गळफास घेऊन आत्महत्या केली.

या घटनेची माहिती मिळताच चंदननगर पोलिसांनी पती गोरख सोनवणे याला अटक केली आहे. सहायक पोलीस निरीक्षक विनोद धुर्वे तपास करीत आहेत.

वर्षाच्या आत विवाहितेची आत्महत्या – माहेरहून पैसे घेऊन येण्यासाठी सतत पैशांची मागणी करून शारीरिक व मानसिक त्रास देण्यात येत असल्याने होणाऱ्या छळाला कंटाळून नवविवाहितेने लग्नानंतर वर्षाच्या आत गळफास घेऊन आत्महत्या केली. वाघोली पोलिसांनी पतीला अटक केली आहे. प्रियंका गणेश कांबळे (वय २५, रा. वाघोली) असे आत्महत्या केलेल्या विवाहितेचे नाव आहे. याबाबत तिची आई अनिता वाघमारे (वय ४५, रा. भोलानगर, कलवा, ठाणे) यांनी वाघोली पोलीस ठाण्यात फिर्याद दिली आहे. त्यावरून पोलिसांनी गणेश दिगंबर कांबळे (वय ३०, रा. गोरक्षनाथ साळुंखे यांची खोली, वाघोली, मूळ रा. हडको, जि. नांदेड) याच्याविरुद्ध आत्महत्येस प्रवृत्त केल्याप्रकरणी गुन्हा दाखल केला आहे. हा प्रकार २१ ऑगस्ट २०२५ ते १ जून २०२६ या कालावधीत घडला आहे. पोलिसांनी दिलेल्या माहितीनुसार, फिर्यादी यांची मुलगी प्रियंका हिचा विवाह गेल्या वर्षी गणेश कांबळे याच्याबरोबर झाला होता. गणेश हा छोट्या-छोट्या कारणांवरून पैशांची मागणी करून तिला मारहाण करत होता तसेच तिचा शारीरिक व मानसिक छळ करत होता. या छळाला कंटाळून तिने १ जून २०२६ रोजी राहत्या घरी गळफास घेऊन आत्महत्या केली. पोलीस उपनिरीक्षक सुवर्णा इंगळे या तपास करीत आहेत.