सराईत गुन्हेगाराकडून ३ पिस्टल व ५ काडतुसे गुन्हे जप्त

गुन्हे शाखेच्या युनिट २ च्या पथकाची कामगिरी : स्वसंरक्षणासाठी केली होती खरेदी

महाराष्ट्र न्यूज नेटवर्क

पुणे : वडगाव येथील आंबेगाव पठार परिसरात थांबलेल्या दोघांकडून गुन्हे शाखेच्या युनिट २ च्या पथकाने ३ पिस्टल आणि ५ जिवंत काडतुसे असा १ लाख २१ हजार रुपयांचा मुद्देमाल जप्त केला आहे.

प्रथमेश पंकज देसाई (वय २१, रा. जाधव बिल्डिंग, नर्‍हे, आंबेगाव) आणि अनिकेत आनंद केंद्रे (वय ३६, रा. सिंहगड रोड, वडगाव) अशी अटक करण्यात आलेल्यांची नावे आहेत. प्रथमेश देसाई याच्याविरुद्ध पर्वती आणि सिंहगड रोड पोलीस ठाण्यात यापूर्वी दोन गुन्हे दाखल आहेत.

गुन्हे शाखेच्या युनिट २ मधील पोलीस उपनिरीक्षक ज्ञानेश्वर दळवी तसेच पोलीस अंमलदार १६ जून रोजी गुन्हे प्रतिबंधक गस्त आणि पेट्रोलिंग करीत होते.

त्यावेळी पोलीस अंमलदार शिवानंद कायगुडे आणि उज्वल मोकाशी यांना त्यांच्या बातमीदारामार्फत माहिती मिळाली की, वडगाव पठार येथे दोन संशयित व्यक्ती थांबल्या असून त्यांच्याकडे हत्यारे आहेत.

यानंतर युनिट २ च्या पथकाने सिंहगड-आंबेगाव पठार परिसरात छापा टाकून दोघांना ताब्यात घेतले. प्रथमेश देसाई याची झडती घेतली असता त्याच्याकडे दोन पिस्टल आणि तीन जिवंत काडतुसे आढळून आली.

तर अनिकेत केंद्रे याची झडती घेतली असता त्याच्याकडे एक पिस्टल आणि दोन जिवंत काडतुसे मिळून आली. दोघांकडे अधिक चौकशी केली असता, मध्य प्रदेशातील उमरटी येथील पप्पीसिंग याच्याकडून ७५ हजार रुपयांना तीन पिस्टल आणि पाच काडतुसे स्वसंरक्षणासाठी खरेदी केल्याची माहिती त्यांनी दिली.

याप्रकरणी सिंहगड रोड पोलीस ठाण्यात त्यांच्याविरुद्ध गुन्हा दाखल करण्यात आला आहे.

ही कारवाई अपर पोलीस आयुक्त तेजस्वी सातपुते, पोलीस उपायुक्त गौहर हसन, सहायक पोलीस आयुक्त शैलेश संखे यांच्या मार्गदर्शनाखाली पोलीस निरीक्षक अजित जाधव यांच्या सूचनेनुसार पोलीस उपनिरीक्षक ज्ञानेश्वर दळवी, पोलीस अंमलदार शिवानंद कायगुडे, उज्वल मोकाशी, शंकर नेवसे, नागनाथ राख, सजेर्राव सरगर, संतोष टकले, विजयकुमार पवार, ओमकार कुंभार, शंकर कुंभार, सद्दाम तांबोळी, अजिम शेख, विनोद चव्हाण, योगेश मांढरे, संजय आबनावे, विशाल दळवी, संदीप शिर्के, ऋषिकेश व्यवहारे, साधना ताम्हाणे आणि विद्या शिंदे यांनी केली.

उमरटी येथून शस्त्रे खरेदी – पुण्यात मध्य प्रदेशातील उमरटी येथून मोठ्या प्रमाणावर शस्त्रांचा पुरवठा होत असल्याचे यापूर्वी आढळून आले होते. त्यानंतर पुणे पोलिसांनी काही महिन्यांपूर्वी मोठा फौजफाटा घेऊन उमरटी गावात धाड टाकली होती. तेथील अनेक घरांमध्ये सुरू असलेले शस्त्रनिर्मितीचे कारखाने उद्ध्वस्त करण्यात आले होते. शस्त्रे तयार करण्यासाठी उभारलेल्या भट्ट्या तोडण्यात आल्या होत्या. तसेच अनेकांना अटक करून मोठ्या प्रमाणावर तयार पिस्टल आणि त्यांचे सुटे भाग जप्त करण्यात आले होते. या दोघांकडून जप्त करण्यात आलेली शस्त्रेही उमरटी येथेच तयार करण्यात आल्याचे प्राथमिक तपासात दिसून येत आहे. त्यामुळे तेथील गावठी पिस्टल तयार करणारे कारखाने पुन्हा सुरू झाल्याची शक्यता व्यक्त केली जात आहे.