मार्केटयार्डातील दुकानातून वेलदोडे, रोकड चोरी

शटरवरील जाळी तोडून दुकानात प्रवेश : मार्केटयार्ड पोलीस ठाण्यात गुन्हा दाखल

महाराष्ट्र न्यूज नेटवर्क

पुणे : मार्केटयार्डातील भुसार बाजारातील एका दुकानाची जाळी तोडून चोरट्यांनी गल्ल्यातील रोकड तसेच ४ किलो हिरवे वेलदोडे चोरून नेल्याची घटना उघडकीस आली.

याबाबत भुसार बाजारातील व्यापारी संतोष कन्हैयालाल बोगावत (वय ५१, रा. हायड पार्क, मार्केट यार्ड) यांनी मार्केट यार्ड पोलीस ठाण्यात फिर्याद दिली आहे. त्यावरून पोलिसांनी चोरट्यांविरुद्ध गुन्हा दाखल केला आहे.

पोलिसांनी दिलेल्या माहितीनुसार, बोगावत यांचे मार्केटयार्डातील भुसार बाजारात दुकान आहे. १३ जून रोजी रात्री साडेआठ वाजता दुकान बंद करण्यात आले होते.

त्यानंतर १५ जून रोजी सकाळी साडेनऊ वाजता दुकान उघडण्यात आले. या दरम्यान मध्यरात्रीच्या सुमारास चोरट्यांनी दुकानाच्या दरवाजावरील जाळी उचकटून आत प्रवेश केला.

गल्ल्यातील १० हजार रुपयांची रोकड तसेच ४ किलो वेलदोडे असा २२ हजार रुपयांचा माल चोरून नेला. पोलीस हवालदार जाधव तपास करत आहेत.

किराणा दुकानातून १५ लाख रुपयांची चोरी – लोणी काळभोरमधील किराणा मालाच्या दुकानाचा दरवाजा उचकटून चोरट्यांनी कपाटातील ड्रॉव्हरमधून १५ लाख रुपये, १० तुपाच्या बरण्या आणि १५ किलो ड्रायफ्रुट असा १५ लाख २८ हजार रुपयांचा माल चोरून नेला. त्याचबरोबर डीव्हीआर मशीनही चोरून नेले आहे. याबाबत विकास बिरजू गुप्ता (वय ४६, रा. कुंजीरवाडी, लोणी काळभोर) यांनी लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, पुणे-सोलापूर रस्त्यावरील कुंजीरवाडी परिसरात गुप्ता यांचे ‘सोमेश ट्रेडर्स’ हे दुकान आहे. ते १८ जून रोजी सकाळी ८ वाजता दुकान उघडण्यासाठी गेले असता दुकानाचा कडी-कोयंडा तुटलेला दिसून आला. तसेच आतील सामान अस्ताव्यस्त पडलेले होते. चोरट्यांनी दुकानातील १० तुपाच्या बरण्या, १५ किलो ड्रायफ्रुट तसेच लाकडी कपाटातील ड्रॉव्हरमध्ये ठेवलेले १५ लाख रुपये असा १५ लाख २८ हजार रुपयांचा माल चोरून नेला. याशिवाय चोरट्यांनी सीसीटीव्हीचे डीव्हीआर मशीनही चोरून नेले. पोलीस उपनिरीक्षक दिगंबर सोनटक्के तपास करत आहेत.