‘सिंहगड’चे संस्थापक मारुती नवले यांच्यावर गुन्हा दाखल

सिंहगड स्प्रिंगडेल स्कूलच्या शिक्षकांचे पगार न देता फसवणूक : जीवे मारण्याची धमकी

महाराष्ट्र न्यूज नेटवर्क

पुणे : सिंहगड टेक्निकल एज्युकेशन सोसायटीच्या २७ शिक्षकांना गेली सहा वर्षे पगार न देता तब्बल ५ कोटी रुपयांची फसवणूक केल्याप्रकरणी तसेच पगार मागितल्यास कामावरून काढून टाकण्याची व जीवे ठार मारण्याची धमकी दिल्याप्रकरणी संस्थापक मारुती नवले व इतरांविरुद्ध भारती विद्यापीठ पोलिसांनी गुन्हा दाखल केला आहे.

याबाबत ४५ वर्षीय एका शिक्षिकेने भारती विद्यापीठ पोलीस ठाण्यात फिर्याद दिली आहे. त्यानुसार पोलिसांनी सिंहगड टेक्निकल एज्युकेशन सोसायटीचे संस्थापक मारुती निवृत्ती नवले, सचिव सुनंदा मारुती नवले, उपाध्यक्ष रचना नवले ऊर्फ अष्टेकर, उपाध्यक्ष रोहित मारुती नवले, संस्थेचे इतर विश्वस्त, अकाऊंट विभागातील संजय मोरे, शरद जराडे व इतरांविरुद्ध गुन्हा दाखल केला आहे.

हा प्रकार आंबेगाव येथील सिंहगड स्प्रिंगडेल स्कूलमध्ये एप्रिल २०२० पासून आजपर्यंत घडल्याचे फिर्यादीत नमूद करण्यात आले आहे. पोलिसांनी दिलेल्या माहितीनुसार, सिंहगड टेक्निकल एज्युकेशन सोसायटीच्या आंबेगाव येथील कॅम्पसमध्ये सिंहगड स्प्रिंगडेल स्कूल आहे.

या शाळेत २७ शिक्षक कार्यरत आहेत. गेली अनेक वर्षे सेवा बजावत असूनही त्यांना नियमित पगार देण्यात आलेला नाही. संस्थेकडून कधीकधी अर्धा पगार किंवा पगाराच्या नावाखाली अत्यल्प रक्कम दिली जात होती.

एप्रिल २०२० पासून या शिक्षकांना नियमित वेतन मिळालेले नाही. शिक्षकांनी पगाराची मागणी केल्यानंतर सुरुवातीला संस्थाचालक व विश्वस्तांनी वेळोवेळी वेतन देण्याचे आश्वासन देत त्यांचा पगार होईल, असा विश्वास दिला.

मात्र, त्यानंतरही पगार न झाल्याने त्यांनी पाठपुरावा केला असता, “नोकरी करायची असेल तर करा, अन्यथा कामावरून काढून टाकू आणि जीवे ठार मारू,” अशी धमकी देण्यात आल्याचे फिर्यादीत म्हटले आहे.

फिर्यादी शिक्षिकेचे १९ लाख ३६ हजार २०७ रुपये तसेच त्यांच्या २६ सहकारी शिक्षकांचे ४ कोटी ८७ लाख ४७ हजार २११ रुपये, असे एकूण ५ कोटी ६ लाख ८३ हजार ४१८ रुपयांची फसवणूक झाल्याचे नमूद करण्यात आले आहे. या प्रकरणाचा तपास वरिष्ठ पोलीस निरीक्षक मानसिंग पाटील करीत आहेत.

६ हजार कर्मचारी, शिक्षक, प्राध्यापक – सिंहगड एज्युकेशन सोसायटीच्या पुणे शहरासह इतर ठिकाणी अभियांत्रिकी, तांत्रिक, फार्मसी, लॉ, आर्ट्स, सायन्स अँड कॉमर्स अशा विविध शिक्षण संस्था आहेत. या संस्थांमध्ये जवळपास ६ हजार शिक्षक, प्राध्यापक आणि कर्मचारी कार्यरत आहेत. या संस्थांमधील अनेक कर्मचाऱ्यांना गेली काही वर्षे नियमित पगार मिळालेला नसल्याने त्यांनी वेळोवेळी आंदोलने केली आहेत. यापूर्वी नवले हॉस्पिटलमधील परिचारिका व इतर कर्मचाऱ्यांनीही वेतन न मिळाल्याने आंदोलन केले होते. तसेच, दोन वर्षे पगार न मिळाल्यामुळे सिंहगड इन्स्टिट्यूटमधील एका सुरक्षारक्षकाने संस्थेच्या परिसरात गळफास घेऊन आत्महत्या केली होती. त्या प्रकरणातही संस्थापक मारुती नवले व इतर विश्वस्तांविरुद्ध गुन्हा दाखल करण्यात आला होता.