खडकवासला धरणातून २७ हजार २०० क्युसेक पाण्याचा नदीत विसर्ग

ओंकारेश्वर मंदिरात शिरले पुराचे पाणी : सिंहगड रोडवरील एकतानगरीत पाणी

महाराष्ट्र न्यूज नेटवर्क

पुणे : धरण क्षेत्रात होत असलेल्या पावसामुळे खडकवासला धरण १०० टक्के भरले असून मध्यरात्री १२ वाजल्यापासून धरणातून नदीपात्रात विसर्ग करण्यास सुरुवात करण्यात आली. सकाळपासून २७ हजार २०० क्युसेक इतके पाणी नदीपात्रात सोडण्यात येत असून मुठा नदीला पूर आला आहे. ओंकारेश्वर मंदिरात पुराचे पाणी शिरले आहे. तसेच सिंहगड रोडवरील एकतानगरीतील जलपूजन, द्वारका आणि शारदा सरोवर सोसायट्यांमध्ये पाणी शिरले आहे.

अग्निशमन दलाची दोन वाहने आणि बोट घटनास्थळी दाखल झाली असून नागरिकांना सुरक्षितस्थळी बाहेर काढण्यात येत आहे. महापौर मंजुषा नागपूरे या पहाटे ५ वाजल्यापासून नदीकाठच्या परिसरात फिरून पूरस्थितीची पाहणी करत प्रशासनाला सूचना देत आहेत.

त्यांनी रजपूत झोपडपट्टी, पुलाची वाडी, एकतानगरी आणि निंबज नगर परिसराची पाहणी केली. येथील नागरिकांना सुरक्षितस्थळी हलविण्याची तयारी महापालिकेकडून सुरू करण्यात आली आहे.

नदीपात्रात चार वाहने अडकली – डेक्कन जिमखाना येथील भिडे पूल पाण्याखाली गेला आहे. नदीपात्रातील वाहने काढून घेण्याचे आवाहन करण्यात आले होते. मात्र, नागरिकांनी वाहने न काढल्याने पुराच्या पाण्यात चार वाहने अडकली आहेत. धरण परिसरात पाऊस असाच सुरू राहिल्यास विसर्ग ३३ हजार क्युसेकपर्यंत वाढविण्यात येण्याची शक्यता आहे. त्यामुळे पुण्यात महापुराची शक्यता व्यक्त करण्यात येत आहे.

खडकवासला धरणातून सोडण्यात आलेला विसर्ग –
मध्यरात्री १२ वाजता – ८४२ क्युसेक
रात्री १ ते १.३० वाजेपर्यंत – १,६८४ क्युसेक
रात्री १.३० ते २.३० वाजेपर्यंत – ३,४२४ क्युसेक
पहाटे २.३० ते ३.१५ वाजेपर्यंत – ६,६३४ क्युसेक
पहाटे ३.१५ ते ३.४५ वाजेपर्यंत – १४,३९३ क्युसेक
पहाटे ३.४५ ते ५.३० वाजेपर्यंत – २२,८०० क्युसेक
सकाळी ५.३० वाजल्यापासून आतापर्यंत – २७,२०३ क्युसेक