विश्वसंत पुष्करमुनीजी म. सा. यांची ११७ वी जन्मजयंती उत्साहात साजरी

सामाजिक कार्याचा गौरव : पुष्कर धामचे अध्यक्ष अशोक सालेचा यांना ‘समाजरत्न’ पुरस्काराने सन्मानित

महाराष्ट्र न्युज नेटवर्क

पुणे : प. पू. विश्वसंत श्री पुष्करमुनीजी म. सा. यांची ११७ वी जन्मजयंती कोंढवा येथील श्री गुरू पुष्कर साधना केंद्र (पुष्कर धाम) येथे रविवारी (दि. २५ ऑक्टोबर) अत्यंत उत्साहपूर्ण, श्रद्धामय आणि भक्तिमय वातावरणात साजरी करण्यात आली. संतांचे पावन सान्निध्य, मान्यवरांची उपस्थिती आणि मोठ्या संख्येने सहभागी झालेल्या भाविकांमुळे संपूर्ण पुष्कर धाम परिसरात धार्मिक चैतन्याचे वातावरण निर्माण झाले.

या मंगलमय सोहळ्याला राष्ट्रसंत प. पू. श्री नरेशमुनीजी म. सा., प. पू. श्री शालिभद्रमुनीजी म. सा. आणि प. पू. मेघाश्रीजी म. सा. आदी संतांचे पावन सान्निध्य लाभले.

त्यांच्या उपस्थितीमुळे जन्मजयंती सोहळ्याला विशेष आध्यात्मिक महत्त्व प्राप्त झाले. या कार्यक्रमासाठी आयएएस अधिकारी आनंद भंडारी, पारसमल लुंकड, विजयकांत कोठारी, बाळासाहेब धोका, बादरमल बुरट, शेवंतीलाल लुंकड, भवरीलाल जीरावाला आणि प्रकाश लुंकड हे प्रमुख पाहुणे म्हणून उपस्थित होते. विविध क्षेत्रांतील मान्यवरांच्या उपस्थितीमुळे या सोहळ्याची शोभा अधिकच वाढली.

अशोक सालेचा यांच्या सामाजिक कार्याचा ‘समाजरत्न’ पुरस्काराने गौरव – या सोहळ्याचे विशेष आकर्षण ठरले ते पुष्कर धामचे अध्यक्ष अशोक सालेचा यांचा ‘समाजरत्न’ पुरस्काराने करण्यात आलेला सन्मान. सामाजिक क्षेत्रातील त्यांचे उल्लेखनीय योगदान, समाजहितासाठी केलेले कार्य आणि सेवाभावी वृत्तीची दखल घेत उपस्थित मान्यवरांच्या हस्ते त्यांना हा प्रतिष्ठेचा पुरस्कार प्रदान करण्यात आला. त्यांच्या या सन्मानामुळे पुष्कर धाम परिवाराच्या आनंदात भर पडली.

दुष्काळग्रस्त शेतकऱ्यांच्या मदतीसाठी जैन समाजाने पुढाकार घ्यावा – आनंद भंडारी – यावेळी अहिल्यानगरचे सीओ तथा आयएएस अधिकारी आनंद भंडारी यांनी उपस्थितांना शुभेच्छा दिल्या. राज्यातील पाणीटंचाई आणि दुष्काळाच्या परिस्थितीचा उल्लेख करत त्यांनी सामाजिक बांधिलकीचे महत्त्व अधोरेखित केले. विशेषतः पाणीसमस्या आणि दुष्काळामुळे अडचणीत सापडलेल्या गरजू शेतकऱ्यांच्या मदतीसाठी जैन समाजाने पुढाकार घ्यावा, असे आवाहन त्यांनी केले. समाजसेवा आणि गरजूंच्या मदतीसाठी एकत्रित प्रयत्न करण्याचा महत्त्वपूर्ण संदेश त्यांनी यावेळी दिला.

यशस्वी आयोजनासाठी पदाधिकारी व कार्यकर्त्यांचे मोलाचे योगदान – या भव्य जन्मजयंती सोहळ्याच्या यशस्वी आयोजनासाठी आणि नियोजनासाठी राजेंद्र भन्साळी, संदीप बलदोटा, वैभव धोका, चंपालाल नहार, राजेश पारख, भाविक दोशी, जया बलदोटा, राणी मुनोत आणि वंदना सुराणा यांनी विशेष परिश्रम घेत मोलाचे योगदान दिले.