साडेतेरा लाखांचा गांजा विमानतळावर पकडला

बँकॉकहून आला होता प्रवासी : बुटाच्या तळव्यांत लपविला होता ३८१ ग्रॅम गांजा

महाराष्ट्र न्यूज नेटवर्क

पुणे : पुणे आंतरराष्ट्रीय विमानतळावर सीमाशुल्क विभागाने बँकॉकहून आलेल्या प्रवाशाकडून गांजा हस्तगत केला आहे. या भारतीय प्रवाशाच्या बुटांच्या तळव्यांमध्ये खास कप्पे तयार करून लपविलेला ३८१.२७ ग्रॅम संशयित गांजाचा अर्क (हशीश) जप्त करण्यात आला आहे. जप्त केलेल्या अमली पदार्थाची अंदाजे किंमत १३ लाख ४४ हजार रुपये आहे.

ही कारवाई पुणे सीमाशुल्क विभागाच्या एअर इंटेलिजन्स युनिटने (एआययू) मंगळवारी (२७ ऑक्टोबर २०२६) सायंकाळी गुप्त माहितीच्या आधारे केली.

मिळालेल्या माहितीनुसार, एअर इंडिया एक्स्प्रेसच्या विमानाने एक भारतीय पुरुष प्रवासी बँकॉकहून पुणे विमानतळावर दाखल झाला होता.

गुप्त माहितीच्या आधारे सीमाशुल्क अधिकाऱ्यांनी संबंधित प्रवाशाला ताब्यात घेऊन त्याच्या केबिन बॅगेची आणि चेक-इन बॅगेजची कसून तपासणी केली. मात्र, सामानामध्ये कोणतीही संशयास्पद वस्तू आढळून आली नाही.

तपासणीदरम्यान अधिकाऱ्यांचे लक्ष प्रवाशाने घातलेल्या काळ्या रंगाच्या स्पोर्ट्स शूजकडे गेले. हे बूट नेहमीपेक्षा जड असल्याचे, तसेच त्यांच्या तळव्यांची जाडी संशयास्पदरीत्या अधिक असल्याचे लक्षात आले.

अधिकाऱ्यांनी दोन्ही बुटांचे आतील तळवे कापून तपासणी केली असता, त्यामध्ये विशेष कप्पे तयार करण्यात आल्याचे आढळले. या कप्प्यांमध्ये काळ्या कापडात गुंडाळलेली आणि लाल चिकटपट्टीने बंद केलेली पाकिटे लपविण्यात आली होती.

या पाकिटांमध्ये गडद तपकिरी आणि काळसर रंगाचा मेणासारखा पदार्थ आढळला. प्राथमिक चाचणीत हा पदार्थ गांजाचा अर्क असल्याचे निष्पन्न झाले.

त्यानंतर सीमाशुल्क विभागाने अमली पदार्थविरोधी कायद्यांतर्गत संशयित अमली पदार्थ जप्त करून संबंधित प्रवाशाला अटक केली. आरोपीला न्यायालयात हजर केले असता, त्याला ७ नोव्हेंबर २०२६ पर्यंत न्यायालयीन कोठडी सुनावण्यात आली.