व्यापाऱ्यांना त्रास देणे नव्हे, नियम पाळणाऱ्यांना प्रोत्साहन देणे हेच अन्न प्रशासनाचे उद्दिष्ट : तुकाराम मुंढे
लाडू-चिवडा उपक्रमाचे कौतुक : अन्नसुरक्षेच्या नियमांचे पालन करण्याचे आवाहन
महाराष्ट्र न्यूज नेटवर्क
पुणे : अन्न व औषध प्रशासनाचा उद्देश व्यापारी आणि उद्योजकांना त्रास देणे नसून, नियमांचे पालन करणाऱ्या व्यावसायिकांना प्रोत्साहन देणे हा आहे. मात्र, अन्नपदार्थ तयार करताना अन्नसुरक्षेच्या नियमांचे काटेकोर पालन होणे आवश्यक आहे, असे प्रतिपादन राज्याचे अन्न व औषध प्रशासनाचे आयुक्त तुकाराम मुंढे यांनी केले.
दि पूना मर्चंट्स चेंबरच्या वतीने आयोजित रास्त दरात लाडू-चिवडा उपक्रमाचे उद्घाटन रविवारी (दि. १ नोव्हेंबर) गंगाधामजवळील मार्केट यार्ड परिसरातील जयजिनेंद्र प्रतिष्ठानच्या नागुश्री सभागृहात झाले.
यावेळी सिक्कीमचे माजी राज्यपाल श्रीनिवास पाटील प्रमुख पाहुणे म्हणून उपस्थित होते. चेंबरचे अध्यक्ष राजेंद्र बाठिया, उपाध्यक्ष अजित बोरा, सचिव ईश्वर नहार, सहसचिव आशिष दुगड यांच्यासह कार्यकारिणी सदस्य उपस्थित होते.
उपक्रमाच्या उत्पादन प्रक्रियेबाबत अन्न प्रशासनाने केलेल्या सूचनांची चेंबरने अंमलबजावणी केल्याबद्दल मुंढे यांनी समाधान व्यक्त केले.
या उपक्रमांतर्गत सुमारे दोन हजार फूड हँडलर्सना प्रशिक्षण देण्यात आले असून, उत्पादन प्रक्रियेवर देखरेख ठेवण्यासाठी तांत्रिक पर्यवेक्षकांची नियुक्ती करण्यात आली आहे.
मुंढे म्हणाले, “सणासुदीच्या काळात नागरिकांना सुरक्षित, दर्जेदार आणि रास्त दरात खाद्यपदार्थ उपलब्ध करून देण्याचा चेंबरचा उपक्रम कौतुकास्पद आहे.
अन्न उत्पादन करणाऱ्या व्यावसायिकांनी कच्चा माल, त्याचे प्रमाण, उत्पादन प्रक्रिया, स्वच्छता, पॅकेजिंग, घटकांची माहिती, उत्पादन तारीख आणि अंतिम वापराची तारीख यांची नोंद ठेवली पाहिजे.
भविष्यात तक्रार उद्भवल्यास उत्पादनाचा मागोवा घेता आला पाहिजे. निर्यात आणि देशांतर्गत बाजारपेठेसाठी वेगवेगळे गुणवत्ता निकष न ठेवता प्रत्येक ग्राहकाला समान दर्जाचे आणि सुरक्षित अन्न मिळाले पाहिजे.”
सिक्कीमचे माजी राज्यपाल श्रीनिवास पाटील यांनी गेल्या ३८ वर्षांपासून हा उपक्रम यशस्वीपणे राबविणाऱ्या चेंबरचे कौतुक केले आणि उपक्रमाच्या पुढील वाटचालीस शुभेच्छा दिल्या.
चेंबरचे अध्यक्ष राजेंद्र बाठिया म्हणाले, “यंदा अन्न प्रशासनाच्या नवीन नियमांची माहिती तुकाराम मुंढे आणि अधिकाऱ्यांकडून घेऊन त्यांची पूर्तता केली आहे.
मुंढे यांनी लाडू फोडून त्याची गुणवत्ता तपासली. तसेच चिवड्यासाठी वापरण्यात येणारे जिन्नस आणि पॅकिंगवरील माहितीची पाहणी केली. त्यांनी समाधान व्यक्त केल्याने चेंबरच्या गुणवत्तापूर्ण कामाला मान्यता मिळाली आहे.”
यावेळी कृषी उत्पन्न बाजार समितीचे उपसभापती नाना अबनावे यांचा सत्कार करण्यात आला. तसेच उपक्रमाचे ३८ वर्षांपासूनचे साक्षीदार व मार्गदर्शक विठ्ठलशेठ मणियार, जितो इंटरनॅशनलच्या पुणे अध्यक्षपदी निवड झाल्याबद्दल मनोज छाजेड, ग्राहक पेठेचे सूर्यकांत पाठक, निकिता बाठिया, सिद्धार्थ हॉस्पिटलचे डॉ. विजय सेटिया, पप्पू महाराज, ताराचंद गौड, हेमंत गौड, फूड कन्सल्टंट सोनाली पवार आणि नागुश्री सभागृहाचे अचल जैन यांचा सन्मान करण्यात आला.
यावेळी हमाल पंचायत, कृषी उत्पन्न बाजार समिती, आडते असोसिएशन, ट्रान्सपोर्ट असोसिएशनचे पदाधिकारी व सदस्य तसेच परिसरातील आजी-माजी नगरसेवक उपस्थित होते.
स्वागत सचिव ईश्वर नहार यांनी केले. प्रास्ताविक अध्यक्ष राजेंद्र बाठिया यांनी केले. आभार सहसचिव आशिष दुगड यांनी मानले, तर सूत्रसंचालन उत्तम बाठिया यांनी केले.
मुंढे यांचे व्यापारी संघटनांना आवाहन : दुष्काळी भागातील शेतकरी कुटुंबांतील अनेक विद्यार्थी शिक्षण आणि स्पर्धा परीक्षांच्या तयारीसाठी पुण्यात येतात. आर्थिक अडचणींमुळे त्यांना भोजनाचा खर्च भागविणे कठीण होते. त्यामुळे चेंबर, व्यापारी संघटना आणि कंपन्यांनी सीएसआर निधीतून अशा विद्यार्थ्यांना जून-जुलैपर्यंत मोफत किंवा सवलतीच्या दरात भोजन उपलब्ध करून द्यावे. पैशांअभावी कोणत्याही विद्यार्थ्याचे शिक्षण थांबू नये, असे आवाहन मुंढे यांनी केले. याला अध्यक्ष राजेंद्र बाठिया यांनी सकारात्मक प्रतिसाद दिला.
व्यापाऱ्यांच्या समस्या जाणून घेऊन मार्गदर्शन करण्याचे मुंढे यांचे आश्वासन – अन्न प्रशासन आणि व्यापाऱ्यांमधील समन्वय वाढविण्यासाठी व्यापारी प्रतिनिधी व अन्न प्रशासनाच्या अधिकाऱ्यांची संयुक्त समिती स्थापन करावी, अशी विनंती अध्यक्ष राजेंद्र बाठिया यांनी केली. यावर मुंढे यांनी दर महिन्याला विविध व्यापारी संघटनांच्या प्रतिनिधींसोबत बैठका घेण्याच्या सूचना अधिकाऱ्यांना दिल्याचे सांगितले. या बैठकांमध्ये व्यापाऱ्यांच्या अडचणी समजून घेऊन त्यांना आवश्यक मार्गदर्शन केले जाईल, असेही त्यांनी स्पष्ट केले.
