भारती विद्यापीठ पोलिसांनी पश्चिम बंगालमधून आरोपीला ताब्यात घेतले, ३६ तासांत गुन्हा उघडकीस
महाराष्ट्र न्यूज नेटवर्क
पुणे : आंबेगाव पठार येथील बांधकाम सुरू असलेल्या इमारतीत एका व्यक्तीच्या डोक्यात पहारीने वार करून खून झाल्याचे उघडकीस आले. मात्र, मृत व्यक्ती आणि आरोपी यांची ओळख पटू शकत नव्हती. अशा परिस्थितीत घटनास्थळी सापडलेल्या एका मोबाईलमुळे पोलिसांना मृतदेहाची ओळख पटली. त्यावरून भारती विद्यापीठ पोलिसांनी पश्चिम बंगालमधील हावडा येथे जाऊन आरोपीला पकडले. खून झाल्याची माहिती मिळाल्यानंतर केवळ ३६ तासांत पोलिसांनी आरोपीला अटक केली.
नयन गोरख प्रसाद (वय ४५, मूळ रा. दुमडा, तहसील तारवारा, जि. सिवान, बिहार) असे खून झालेल्याचे नाव आहे. तर बिरण सुबल करकर ऊर्फ बिरण सुबल कर्माकर (वय ३०, रा. बजे बिंडोल, बिंडोले, रायगंज, परीयाल, उत्तर दिनाजपूर, पश्चिम बंगाल) असे आरोपीचे नाव आहे. हे दोघेही सुतार होते.
आंबेगाव पठार येथील तोरणा मोहर बिल्डिंगजवळ बांधकाम सुरू असलेल्या साईटच्या पहिल्या मजल्यावरील फ्लॅटमध्ये १० फेब्रुवारी रोजी मध्यरात्री एकाच्या डोक्यात वार करून खून करण्यात आला, अशी माहिती भारती विद्यापीठ पोलिसांना मिळाली.
मृतदेह कुजण्यास सुरुवात झाल्यामुळे चेहरा स्पष्ट दिसत नव्हता. तेथील कामगारांकडूनही कोणतीही उपयुक्त माहिती मिळाली नाही, त्यामुळे मृत व्यक्तीची ओळख पटविणे कठीण झाले होते.
त्या खोलीत रक्ताने माखलेला एक मोबाईल पोलिसांना आढळला. त्यावरून मृताची ओळख पटविण्याच्या सूचना वरिष्ठ पोलीस निरीक्षक सावळाराम साळगांवकर यांनी तपास पथकाचे अधिकारी निलेश मोकाशी यांना दिल्या.
रक्ताने माखलेल्या मोबाईल फोनचा तांत्रिक तपास केल्यावर नयन प्रसाद याचा खून झाल्याचे निष्पन्न झाले. मोबाईलच्या तांत्रिक विश्लेषणातून नयन प्रसाद आणि बिरण करकर यांचा एकत्र फोटो मिळाला. तसेच, हे दोघे त्या खोलीत राहत असल्याची खात्री झाली. त्यामुळे बिरण करकर यानेच नयन प्रसाद याचा खून केल्याचे स्पष्ट झाले.
तो पश्चिम बंगालला पळून गेल्याची माहिती मिळाल्यानंतर पोलीस उपनिरीक्षक निलेश मोकाशी, पोलीस अंमलदार मंगेश पवार आणि अभिनय चौधरी यांनी पश्चिम बंगालला जाऊन शोध घेतला. त्यावेळी आरोपी हावडा रेल्वे स्टेशन परिसरात सापडला. त्याला पश्चिम बंगालमधील हावडा येथील गोलाबारी पोलीस ठाण्यात १२ फेब्रुवारी रोजी अटक करण्यात आली.
ही कामगिरी अपर पोलीस आयुक्त प्रविणकुमार पाटील, पोलीस उपायुक्त स्मार्तना पाटील, आर्थिक व सायबर गुन्हे शाखेचे पोलीस उपायुक्त विवेक मासाळ, सहायक पोलीस आयुक्त राहुल आवारे यांच्या मार्गदर्शनाखाली वरिष्ठ पोलीस निरीक्षक सावळाराम साळगांवकर, गुन्हे निरीक्षक राहुलकुमार खिलारे, पोलीस उपनिरीक्षक निलेश मोकाशी, तसेच पोलीस अंमलदार चेतन गोरे, महेश बारवकर, मंगेश पवार, सचिन सरपाले, निलेश खैरमोडे, सचिन गाडे, मितेश चोरमोले, अभिनय चौधरी आणि सागर बोरगे यांनी केली.
