मुंबई सायबर क्राईम पोलिसांच्या नावाने महिलेला गंडा
पार्सलमध्ये ड्रग्ज सापडल्याचे सांगून केली ७ लाखांची फसवणूक
महाराष्ट्र न्युज नेटवर्क
पुणे : मुंबई सायबर क्राईम येथून बोलत असल्याचे सांगून “तुमचे ब्लू डार्ट पार्सल आले आहे, त्यात ड्रग्ज सापडले आहेत” असे सांगून अटक होण्याची भीती दाखवून ७ लाख रुपयांची फसवणूक केल्याचा प्रकार समोर आला आहे.
याबाबत एका ५८ वर्षांच्या महिलेने येरवडा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार महिला येरवडा परिसरात राहतात. सायबर चोरट्यांनी त्यांच्या मोबाईल क्रमांकावर गेल्या महिन्यात संपर्क साधला होता.
परदेशातून ब्लू डार्ट या कुरिअर कंपनीद्वारे पाठविलेले पाकीट विमानतळावर जप्त करण्यात आले असल्याचे सांगितले. त्या पाकिटात एटीएम कार्ड, पासपोर्ट, कपडे, लॅपटॉप आणि २०० ग्रॅम एमडीएमए हा अमली पदार्थ सापडल्याचे सांगण्यात आले.
त्यानंतर चोरट्यांनी व्हिडिओ कॉल करून वॉरंटसंबंधी एक लेटर वॉट्सअॅपवर पाठवले आणि “तुम्हाला पोलीस अटक करणार आहेत” असे भासवले. तक्रारदार महिलेकडून बँक तपशील घेऊन ६ लाख ९५ हजार रुपये पाठविण्यास भाग पाडून त्यांची फसवणूक करण्यात आली.
हा प्रकार ७ ते १० ऑक्टोबर २०२५ दरम्यान घडला. वरिष्ठ पोलीस निरीक्षक अंजुम बागवान या प्रकरणाचा तपास करत आहेत.
एकाच महिलेची दोघा सायबर चोरट्यांनी केली फसवणूक – एका ४२ वर्षांच्या महिलेची डेटिंग अॅपवर नेदरलँडमध्ये राहणाऱ्या रोहन पटेल नावाच्या व्यक्तीशी ओळख झाली. त्याने स्वतःला भारतात येत असल्याचे सांगितले. “मी एअरपोर्टवर आलो असून, कस्टमने माझ्याकडील १२०० युरो इतकी रक्कम जप्त केली आहे. ८५,८०० रुपयांचा दंड भरावा लागेल, तू आता पैसे दे, मी आल्यावर परत करतो,” असे सांगितले. महिलेने त्याच्या सांगण्यावरून ८५,८०० रुपये पाठवले. याचदरम्यान तिची लिओ नावाच्या व्यक्तीशी ओळख झाली. त्याने स्वतःला लंडनमध्ये जहाजाचा कॅप्टन असल्याचे सांगितले. त्याने “रिंग, शूज, कपडे, कॅश इत्यादी वस्तू गिफ्ट म्हणून कुरिअर केल्या” असे सांगून एक ट्रॅकिंग लिंक शेअर केली. नंतर एअरपोर्टवरून फोन आला आणि “पार्सलमध्ये कॅश आहे, त्यासाठी ४२,५०० रुपयांची पेनल्टी भरावी लागेल” असे सांगण्यात आले. तिने ती रक्कम ट्रान्सफर केली. त्यानंतरही पार्सल न मिळाल्याने पुन्हा “दीड लाख रुपये आणखी भरावे लागतील” असे सांगितले. तिने ती रक्कमही पाठवली. एकूण २ लाख ७७ हजार रुपये ट्रान्सफर केल्यानंतर तिने रोहन पटेल याला विचारले, “माझे पैसे कधी परत करणार?” तेव्हा त्याने “मी पोहोचलो की पैसे देतो” असे सांगितले आणि नंतर तिला ब्लॉक केले. तिने लिओ याला विचारले, “मला गिफ्ट मिळाले नाहीत,” त्यावर त्याने “इन्शुरन्सचे पैसे पे करावे लागतील, मग गिफ्ट मिळेल” असे सांगितले. तिने “मला तुझे गिफ्ट नको आहेत” असे सांगताच लिओनेही तिला ब्लॉक केले. या दोन्ही प्रकरणांचा तपास पोलीस निरीक्षक उत्तम नामवडे करत आहेत.
