महाराष्ट्र जैन वार्ता
पुणे : दरवर्षी प्रमाणे याही वर्षी स्व. इंदुमती बन्सीलाल संचेती या ट्रस्टच्या वतीने मार्केट यार्डात पाणपोईची सुरुवात करण्यात आली. त्यामुळे मार्केट यार्डात येणाऱ्या हजारो नागरिकांची तहान भागणार आहे. तसेच पक्षांसाठी देखील दाना-पाण्याची व्यवस्था करण्यात आली आहे.
या पाणपोईचे उद्घाटन पोलीस उपायुक्त मिलिंद मोहिते यांच्या हस्ते झाले. यावेळी मार्केट यार्ड पोलिस स्टेशनचे वरिष्ठ पोलिस निरीक्षक विश्वजित जगताप, बिंद्रा कंपनीचे संस्थापक अध्यक्ष गुरूविंदरसिंग बिंद्रा, काँग्रेस जेष्ठ नेते अभय छाजेड, ट्रस्टचे अध्यक्ष अभय संचेती, जेठमल दाधीच, मनीष संचेती, विजय शिंगवी, नितीन नहार, सुरेंद्र श्रीश्रीमाळ, सचिन गदीया, हरकचंद देसरडा, सुरेश वानगोता, महेश गायकवाड, संकेत बोथरा, अयुब शेख, विशाल चांदणे यांच्यासह व्यापारी उपस्थित होते.
मिलिंद मोहिते म्हणाले, “संचेती ट्रस्टने उभारलेली हे पाणपोई उन्हाळ्यात नागरिकांसाठी अत्यंत उपयुक्त ठरणार आहे. ही समाजसेवा उल्लेखनीय असून अश्या उपक्रमामुळे समाजामध्ये परोपकाराची भावना वाढीस लागते. पाणी हे तीर्थ असून ते पाजल्याने पुण्य मिळते.”
ट्रस्टचे अध्यक्ष अभय संचेती म्हणाले, “आशिया खंडातील क्रमांक दोनची बाजारपेठ असलेल्या मार्केट यार्डात संपूर्ण देशभरातून नागरिक येत असतात. सध्या पुणे शहरात प्रचंड उन्हाचा तडाखा आहे. अशा परिस्थितीत व्यापार करण्यासाठी येणारे व्यापारी, ग्राहक, ट्रक चालक, हमाल बंधू, रिक्षाचालक यांच्यासह असंख्य नागरिक येथे येतात. त्यामुळेच स्व. इंदुमती बन्सीलाल संचेती ट्रस्टच्या वतीने पाणपोईची व्यवस्था करण्यात आली आहे.”
