फसवणुकीसाठी लागणाऱ्या बँक खात्यांचे रॅकेट चालवणारे सहा जण अटकेत: हजारो खात्यांची माहिती कंबोडियाला पाठविली
महाराष्ट्र न्यूज नेटवर्क
पुणे : भारतातील विविध शहरांतील नागरिकांना शेअर मार्केटमध्ये गुंतवणूक करून मोठा नफा कमावण्याचे आमिष दाखवून सायबर फसवणुकीच्या जाळ्यात ओढले जात आहे. या मोठ्या घोटाळ्याचे मुळ कंबोडियात असल्याचे एका तपासातून स्पष्ट झाले आहे. झारखंड, गुजरात आणि ओडिशातील व्यक्ती पुण्यात बसून बँक खात्यांचे रॅकेट चालवत होते. यातील सहा जणांना पिंपरी-चिंचवड सायबर पोलिसांनी अटक केली आहे.
पिंपरी-चिंचवड सायबर पोलिस ठाण्यात शेअर मार्केट फसवणुकीचा गुन्हा दाखल झाल्यानंतर पोलीस हवालदार खरात यांना मिळालेल्या माहितीवरून शुभम मोहन लोंढे (वय २४, रा. गोसावीनगर, चिखली) याला ताब्यात घेण्यात आले. चौकशीत त्याने गुन्ह्यासाठी बँक खाते सॅम ऊर्फ डेव्हिड याला दिल्याचे सांगितले.
सॅम ऊर्फ डेव्हिड हा दोन वर्षांपासून टेलिग्रामद्वारे संपर्क साधून बँक खाती गोळा करत होता. तो १५ ते २० पेक्षा अधिक मोबाईल क्रमांक वापरत असल्याचे आढळले. पोलिसांनी त्याचा मोबाईल अॅनालिसिस केला असता तो गोवा येथे असल्याचे निष्पन्न झाले.
२३ जानेवारी रोजी पुण्यात आल्याची माहिती मिळाल्यानंतर हिंजवडी येथे सापळा रचून त्याला अटक करण्यात आली. त्याचे खरे नाव संबोधकुमार श्रीपती नायक (वय २२, रा. राऊलकेला, ओडिशा) असे आहे.
त्याच्या चौकशीत पुण्यातील विविध हॉटेल्समध्ये रुम बुक करून बँक खात्यांचे रॅकेट चालवले जात असल्याचे समोर आले. यानंतर पोलीस निरीक्षक प्रविण स्वामी आणि पोलीस उपनिरीक्षक सागर पोमण यांच्या नेतृत्वाखाली दोन पथकांनी पिंपरी-चिंचवड आणि हिंजवडी परिसरातील हॉटेल्सवर छापे टाकून पाच जणांना ताब्यात घेतले.
बावधन येथे राहणारा राजअंश सिंग संतोष सिंग (वय २१, मुळ रा. हजारीबाग, झारखंड) हा आरोपी कंबोडियातील मास्टरमाइंडच्या निर्देशानुसार एपीके फाईल डाऊनलोड करून बँक खात्यांना मोबाईल क्रमांक लिंक करत असे. दररोज ४-५ बँक खात्यांवर पैसे ट्रान्झॅक्शन होत होते. तसेच, आरोपी सायबर गुन्ह्यात ट्रॅप होऊ नये म्हणून लोकेशन सतत बदलत होते.
गुन्ह्याच्या पुढील तपासात गुजरातमधील वलसाड येथून गौरव अनिल शर्मा (वय ४०) आणि अंकुश रामराव मोरे (वय ३१, रा. नाशिक) यांना अटक करण्यात आली. या आरोपींकडून ९ मोबाईल, १ टॅब आणि १० चेक बुक जप्त करण्यात आले.
महत्त्वाचे मुद्दे
आरोपी पुण्यात बसून सायबर फसवणुकीसाठी बँक खात्यांची माहिती कंबोडियाला पाठवत होते.
आतापर्यंत हजारो बँक खात्यांची माहिती कंबोडियातील टोळीला पाठविण्यात आली आहे.
दररोज ५-६ जणांची फसवणूक केली जात होती.
हॉटेलमध्ये रुम घेऊन नागरिकांना फसवणुकीचे फोन करण्यात येत होते.
पोलिसांना गुन्हेगारांचा ठावठिकाणा सापडू नये म्हणून हॉटेलबाहेर वॉचर्स नेमण्यात आले होते.
आरोपींकडील मोबाईल डेटा तपासला असता देशभरातील १०२ सायबर फसवणुकीचे गुन्हे आढळले.
शेअर मार्केटमध्ये गुंतवणूक करताना केवळ सेबी (SEBI) प्रमाणित अॅप्स आणि प्लॅटफॉर्मचा वापर करावा. कोणत्याही अनोळखी व्यक्तीला मोबाईल स्क्रीन, बँक खाते किंवा वैयक्तिक माहिती शेअर करू नये.
ही कारवाई पोलीस आयुक्त विनयकुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त वसंत परदेशी, पोलीस उपायुक्त संदीप डोईफोडे, सहायक पोलीस आयुक्त डॉ. विशाल हिरे यांच्या मार्गदर्शनाखाली करण्यात आली.
