तामिळनाडुहून मुंबईला जाणार्या तरुणाचे पुण्यात अपहरण
हॉटेलमधून सुटका करून ६ जणांना अटक
महाराष्ट्र न्यूज नेटवर्क
पुणे : तामिळनाडु येथून मुंबईला जाणार्या तरुणाचे पुण्यात अपहरण करण्यात आले असून, त्याला हॉटेलमध्ये डांबून ठेवून मारहाण केली जात होती, अशी माहिती पुणे पोलिसांना मिळाली. त्यानंतर पोलिसांनी सोलापूर रोडवरील पिंगारा हॉटेलमधून या तरुणाची सुटका केली आणि त्याच्या अपहरणाच्या प्रकरणात ६ जणांना अटक केली. हडपसर पोलिस ठाण्यात या प्रकरणाची चौकशी केली असता, फिर्यादी आणि आरोपी हे दोघेही पिडित असल्याचे समोर आले.
व्यंकटेश वयांकटेश सुब्रम्हण्यम (वय ३५, तिरुवन्नामलाई, तामिळनाडु) यांनी हडपसर पोलिस ठाण्यात फिर्याद दिली आहे. त्यानुसार, मोहम्मद फर्मान मेहेरबान (वय २७, बिजनोर, उत्तर प्रदेश), अर्जुन कुमार शिवकुमार (वय २८, बिजनोर, उत्तर प्रदेश), देवेंद्र सुनिल अलभर (वय २५, श्रीगोंदा, अहमदनगर), अंकित अर्जुन अडागळे (वय २५, मुंबई),
अविनाश दत्तात्रय कदम (वय ४३, शिक्रापूर), आणि प्रियांक राणा (वय ३३, रुडकी, उत्तराखंड) अशी अटक केलेल्यांची नावे आहेत. पोलिसांनी दिलेल्या माहितीनुसार, रमेश नावाच्या व्यक्तीने व्यंकटेश यांना नोकरी देण्याचे सांगितले आणि त्यांना आरोप्यांना पैसे गोळा करून त्यांचे खाते ट्रान्सफर करण्यासाठी सांगितले.
व्यंकटेश मुंबईला गेले आणि त्यांनी पैसे ट्रान्सफर केले. ट्रान्सफर झाल्यानंतर रमेश मोबाईल बंद करून पसार झाला. यामुळे आरोपींना त्यांची फसवणूक झाल्याचे लक्षात आले, आणि त्यात व्यंकटेश यांचा सहभाग असल्याचा संशय त्यांनी व्यक्त केला.
त्यांनी व्यंकटेशला पुण्याजवळ बोलावून त्याचे अपहरण करून सोलापूर रोडवरील पिंगारा हॉटेलमध्ये नेले आणि मारहाण केली. व्यंकटेशने आपल्या नातेवाईकांना फोन करून माहिती दिली, त्यानंतर पुणे पोलिसांना खबर मिळाली आणि पोलिसांनी शोध घेत ९ जानेवारी रोजी तरुणाची सुटका केली.
पोलिसांनी आरोपींना हडपसर पोलिस ठाण्यात आणून चौकशी केली. यात व्यंकटेश आणि आरोपी यांना रमेश याच्या कोणत्याही शारीरिक भेटीचा अनुभव नाही आणि ते केवळ फोनवर बोलले होते. यावरून हे स्पष्ट झाले की, रमेश यांनी दोघांनाही फसवले होते.
हडपसर पोलिस ठाण्याचे सहायक पोलीस निरीक्षक अर्जुन कुदळे तपास करत आहेत. ही कामगिरी पोलीस आयुक्त अमितेशकुमार, सह पोलीस आयुक्त रंजनकुमार शर्मा, अपर पोलीस आयुक्त शैलेश बलकवडे, पोलीस उपायुक्त निखिल पिंगळे, सहायक पोलीस आयुक्त राजेंद्र मुळीक यांच्या मार्गदर्शनाखाली पोलिस निरीक्षक विजय कुंभार आणि त्यांच्या टीमने केली आहे.
