आईला मारहाणीपासून सोडवण्यासाठी धावला भाऊ
महाराष्ट्र न्यूज नेटवर्क
पुणे : दारू पिण्यासाठी पैसे मागितल्यावर नकार दिल्याने मुलाने आईला मारहाण करण्यास सुरुवात केली. या प्रसंगी आईला वाचवण्यासाठी धावून आलेल्या सख्या भावावर कुर्‍हाडीने वार करून त्याला ठार मारण्याचा प्रयत्न करण्यात आला.
याबाबत जखमी दिगंबर अरुण जाधव (वय ३५, रा. रामोशीवाडी, गोखलेनगर) यांनी फिर्याद दिली आहे. त्यावरून पोलिसांनी गणेश अरुण जाधव (वय २८, रा. रामोशीवाडी, गोखलेनगर) याला अटक केली आहे. ही घटना सेनापती बापट रोडवरील रत्ना हॉस्पिटलमागील रामोशीवाडीत शनिवारी सायंकाळी सात वाजता घडली.
पोलिसांनी दिलेल्या माहितीनुसार, दिगंबर आणि गणेश जाधव हे सख्या भाऊ आहेत. दोघेही मजुरीचे काम करतात. शनिवारी सायंकाळी गणेशने दारू पिण्यासाठी आईकडे पैसे मागितले. मात्र, आईने पैसे देण्यास नकार दिला. यामुळे चिडलेल्या गणेशने आईला शिवीगाळ करत हाताने मारहाण करण्यास सुरुवात केली.
हे भांडण सोडवण्यासाठी दिगंबर धावून आला असता, गणेशने “तुला संपवून टाकतो” असे म्हणत घराच्या कोपर्‍यात ठेवलेल्या सरपण फोडण्याच्या कुर्‍हाडीने दिगंबर यांच्या डोक्यात प्राणघातक वार केला.
त्या वेळी आई मध्ये येताच तिलाही डोक्यात मारून गंभीर जखमी केले. या प्रकारानंतर पोलिसांनी खुनाचा प्रयत्न केल्याचा गुन्हा दाखल करून गणेश जाधव याला अटक केली आहे. सध्या या प्रकरणाचा तपास सहायक पोलीस निरीक्षक गणेश धामणे करत आहेत.
