महापालिकेचा पुढाकार; उपचारांसाठी दोन लाखांपर्यंतची मदत
महाराष्ट न्यूज नेटवर्क
पुणे : गुइलेन बॅरे सिंड्रोम या आजारावर पुणे महापालिकेच्या कमला नेहरू रुग्णालयात मोफत उपचार केले जाणार आहेत. तसेच, खासगी रुग्णालयांमध्ये उपचार घेणाऱ्या रुग्णांना शहरी गरीब योजनेंतर्गत दोन लाख रुपयांपर्यंत आर्थिक मदत मिळणार आहे. याशिवाय, या रुग्णांसाठी ‘इम्युनोग्लोब्यूलिन’ हे महागडे इंजेक्शन मोफत उपलब्ध करून दिले जाणार आहे.
महापालिका आयुक्त डॉ. राजेंद्र भोसले यांच्या निर्णयानुसार, वाढत्या ‘जीबीएस’ रुग्णसंख्येमुळे रुग्णांना मोठा आर्थिक दिलासा मिळणार आहे. केंद्रीय राज्यमंत्री मुरलीधर मोहोळ यांनी या खर्चिक आजारावरील उपचारांसाठी महापालिकेकडे आर्थिक मदतीची मागणी केली होती, त्यानुसार हा निर्णय घेण्यात आला.
पुण्यातील जीबीएस रुग्णांना आता कमला नेहरू रुग्णालयात मोफत उपचार दिले जातील. तसेच, खासगी रुग्णालयांमध्ये उपचार घेणाऱ्यांना शहरी गरीब योजनेंतर्गत दोन लाखांपर्यंतची आर्थिक मदत मिळेल. विशेष म्हणजे, महागड्या ‘इम्युनोग्लोब्यूलिन’ इंजेक्शनची मोफत उपलब्धता रुग्णांसाठी दिलासा ठरणार आहे.
महापालिकेने नांदेड आणि किरकटवाडी भागातील पाणीपुरवठा अडचणींच्या सोडवणुकीसाठी पुढाकार घेतला आहे. या भागातील डीएसके विश्व, उत्सव, मोरया स्पर्श, पांडुरंग रेसिडेन्सी, होम फेज २, अर्बन पार्क, कमल ग्रीन लीफ, आनंदबन, इंगवले पाटील कॉम्प्लेक्स, उज्ज्वल निसर्ग सोसायटी, साई गॅलेक्सी या सोसायट्यांना पिण्याच्या पाण्याचे टँकर पुरवले जाणार आहेत. महापालिकेच्या या उपाययोजनांमुळे पुणेकरांना मोठा दिलासा मिळाला असून, पुढील काळातही अशा योजना कार्यान्वित ठेवण्याचे महापालिकेचे उद्दिष्ट आहे.
