कार चोरून नेणारे सीसीटीव्हीत कैद : तिघांना अटक
महाराष्ट्र न्यूज नेटवर्क
पुणे : प्रवासी म्हणून कारमध्ये बसून कारचालकाला मारहाण करून त्याचा खून केला आणि मृतदेह वाटेत टाकून कार चोरून नेणाऱ्या टोळीचा छडा पुणे ग्रामीण पोलीस दलाच्या स्थानिक गुन्हे शाखेने लावला आहे. या प्रकरणी नाशिकमधील तिघांना अटक करण्यात आली आहे.
विशाल आनंद चव्हाण (वय २२, रा. महेश अपार्टमेंट, गंगापूर रोड, नाशिक), मयूर विजय सोळसे (वय २३, रा. गोकुळवाडी, श्रीरंगनगर, नाशिक) आणि ऋतुराज विजय सोनवणे (वय २१, रा. गोकुळवाडी, गंगापूर रोड, नाशिक) अशी अटक केलेल्यांची नावे आहेत.
राजेश बाबुराव गायकवाड (वय ५६, रा. निधी अपार्टमेंट, जेल रोड, नाशिक) असे खून झालेल्या कारचालकाचे नाव आहे. राजेश गायकवाड यांचा आळेफाटा येथील संतवाडी परिसरात दोन्ही हात पाठीमागे बांधलेल्या अवस्थेत मृतदेह आढळून आला होता. त्यावरून आळेफाटा पोलिसांनी खुनाचा गुन्हा दाखल केला होता.
राजेश गायकवाड हे २७ जानेवारी रोजी नाशिक येथून इर्टिगा कारने भाड्याने प्रवास करत पुण्यात आले होते. रात्री साडेदहा वाजता गायकवाड यांनी आपल्या पत्नीला फोन करून पुण्याहून निघाल्याचे सांगितले. पण ते नाशिकला पोहोचलेच नाहीत.
त्यांच्या मोबाईलच्या लोकेशनवरून तो पुणे-नाशिक महामार्गावरील संतवाडी रोडवरील समाधान हॉटेलमध्ये असल्याची माहिती मिळाली. त्यानुसार, त्यांचे कुटुंबीय आळेफाटा येथे पोहोचले. त्यांनी शोध घेतल्यानंतरही गायकवाड सापडले नाहीत, त्यामुळे प्रथम हरवल्याची तक्रार नोंदविण्यात आली. दुसऱ्या दिवशी संतवाडी परिसरात त्यांचा मृतदेह आढळून आला.
स्थानिक गुन्हे शाखेच्या पोलिसांनी मृतदेह सापडलेल्या रोडवरील सीसीटीव्ही फुटेज तपासले. त्यात नाशिक-पुणे महामार्गाच्या लेनलगतच्या एका हॉटेलच्या सीसीटीव्ही फुटेजमध्ये राजेश गायकवाड यांच्या इर्टिगा कारने विरुद्ध दिशेने येऊन मृतदेह आढळलेल्या ठिकाणी थांबले, त्यानंतर ती परत आळेफाटा बाजूकडे जाऊन माळशेज घाटाच्या दिशेने गेली होती.
येताना, चाळकवाडी टोलनाक्यावरून नाशिककडे जात असताना कारमध्ये गायकवाड यांशिवाय आणखी दोन जण होते. त्यापैकी एकाच्या डोक्यावर पांढऱ्या रंगाची टोपी होती. या माहितीच्या आधारे पोलिसांनी चाकण चौकातील नाशिककडे जाणाऱ्या गाडीतळावर चौकशी केली. तेव्हा टोपी घातलेल्या व्यक्तीसोबत आणखी तीन व्यक्ती असल्याचे समोर आले.
पुढील तपासात ही कार कसारा घाटात सापडल्याने आरोपी नाशिक परिसरातील असल्याचा संशय बळावला. पोलिसांनी त्या परिसरातील गुप्त बातमीदारांकडून माहिती मिळवली. त्यातून सीसीटीव्ही फुटेजमध्ये दिसलेली व्यक्ती नाशिकमधील युवराज शिंदे आणि विशाल चव्हाण असल्याचे स्पष्ट झाले.
पुढील चौकशीत ते ओतूरकडे येत असल्याची माहिती मिळाल्यानंतर पोलिसांनी सापळा रचून तिघांना अटक केली. अटक केल्यानंतर चौकशीत आरोपींनी गुन्ह्याची कबुली दिली. त्यांनी नाशिकला जाण्यासाठी प्रवासी म्हणून कारमध्ये बसल्याचे सांगितले. आळेफाट्याजवळ त्यांनी कारमध्येच गळा आवळून गायकवाड यांचा खून केला. मृतदेह तिथेच टाकून ते कार घेऊन निघून गेले.
युवराज शिंदे याने यापूर्वीही इतर साथीदारांच्या मदतीने अशाच प्रकारच्या गुन्ह्यांची पद्धत अवलंब करून इर्टिगा कार जबरदस्तीने चोरून नेली होती. त्याबाबत चाकण पोलीस ठाण्यात गेल्या वर्षी गुन्हा दाखल आहे. आरोपी हे सराईत गुन्हेगार असून, विशाल चव्हाण आणि मयूर सोळसे यांच्यावर गंगापूर (नाशिक) पोलीस ठाण्यात खुनाचा गुन्हा दाखल आहे. युवराज शिंदे याच्यावर मालमत्ता चोरी आणि शरीराविरुद्धचे चार गुन्हे दाखल आहेत.
ही कारवाई पोलीस अधीक्षक पंकज देशमुख, अपर पोलीस अधीक्षक रमेश चोपडे, उपविभागीय पोलीस अधिकारी रवींद्र चौधर यांच्या मार्गदर्शनाखाली करण्यात आली. स्थानिक गुन्हे शाखेचे पोलीस निरीक्षक अविनाश शिळीमकर, आळेफाटा पोलीस ठाण्याचे निरीक्षक दिनेश तायडे, सहायक पोलीस निरीक्षक कुलदीप संकपाळ, पोलीस उपनिरीक्षक अमित सिदपाटील, आळेफाट्याचे सहायक पोलीस निरीक्षक अमोल पन्हाळकर, पोलीस उपनिरीक्षक चंद्रशेखर डुंबरे यांच्यासह दीपक साबळे, राजू मोमीन, संदीप वारे, अक्षय नवले, विक्रम तापकीर, निलेश सुपेकर, विनोद गायकवाड, अमित माळुंजे, सचिन कोबल, गणेश जगताप, ओंकार खुणे यांनी केली आहे.
