बनावट जी.आर. काढून फसवणुकीचा प्रयत्न : लाचलुचपत प्रतिबंधक विभागाची कारवाई
महाराष्ट्र न्यूज नेटवर्क
पुणे : पुणे जिल्हा शिक्षण मंडळातील विविध माध्यमिक शाळांमधील कला शिक्षकांना पदवीधर वेतनश्रेणीचा लाभ मिळवून देण्यासाठी अवर सचिव प्रवीण मुंढे यांच्या नावाने बनावट शासन निर्णय (जी.आर.) काढण्यात आला.
शिक्षणाधिकाऱ्यांना देण्यासाठी या कला शिक्षकांकडून तब्बल १७ लाख रुपये गोळा करण्यात आले. पुणे जिल्हा परिषदेच्या माध्यमिक शिक्षणाधिकारी डॉ. भाऊसाहेब कारेकर यांच्या सतर्कतेमुळे हा प्रकार उघडकीस आला. याप्रकरणी १७ लाख रुपये गोळा करणाऱ्यावर गुन्हा दाखल करण्यात आला आहे.
डॉ. दीपक चांदणे असे गुन्हा दाखल झालेल्या व्यक्तीचे नाव आहे. याप्रकरणी लाचलुचपत प्रतिबंधक विभागाचे पोलीस निरीक्षक अमोल बबन भोसले यांनी बंडगार्डन पोलीस ठाण्यात फिर्याद दिली आहे. हा प्रकार पुणे जिल्हा शिक्षण मंडळाच्या कार्यालयात १९ ऑक्टोबर २०२४ ते २७ डिसेंबर २०२४ या कालावधीत घडला.
पोलिसांनी दिलेल्या माहितीनुसार, पुणे जिल्हा शिक्षण मंडळाच्या विविध माध्यमिक शाळांमधील अपदवीधर कला शिक्षक, ज्यांनी ए.टी.डी. ही पदविका धारण केलेली आहे, अशा शिक्षकांना ए.एम. ही पदवी धारण केल्यानंतर वरिष्ठ पदवीधर वेतनश्रेणी लागू करण्याबाबतचा प्रस्ताव राज्य शासनाकडे दाखल करण्यात आला होता.
डॉ. दीपक चांदणे याने शिक्षण विभागात ओळख असल्याचे भासवून, शासनाकडून आर्थिक लाभ मिळवून देण्याच्या हेतूने इतरांशी संगनमत केले. त्याने शालेय शिक्षण व क्रीडा विभागाचे अवर सचिव प्रवीण मुंढे यांच्या डिजिटल स्वाक्षरीचा वापर करून बनावट शासन निर्णय तयार केला.
तसेच या बनावट शासन निर्णयाचा संदर्भ देत शिक्षणाधिकाऱ्यांच्या बनावट सह्यांसह ए.एम. मान्यतेचा बनावट आदेश तयार केला. या कामासाठी डॉ. दीपक चांदणे याने शिक्षणाधिकारी डॉ. भाऊसाहेब कारेकर यांना देण्यासाठी या शिक्षकांकडून एकूण १७ लाख रुपये गोळा केले.
बनावट शासन निर्णय व्हॉट्सअॅपद्वारे शिक्षणाधिकारी डॉ. भाऊसाहेब कारेकर यांना मिळाला. त्याची छाननी केल्यानंतर संबंधित शासन निर्णय राज्य शासनाच्या अधिकृत संकेतस्थळावर कोठेही आढळून आला नाही. तसेच अवर सचिव प्रवीण मुंढे यांच्या बनावट स्वाक्षरीने हा आदेश काढण्यात आल्याचे स्पष्ट झाले.
त्यानंतर डॉ. भाऊसाहेब कारेकर यांनी लाचलुचपत प्रतिबंधक विभागाकडे तक्रार दाखल केली. विभागाने संबंधित शिक्षक आणि मुख्याध्यापकांची चौकशी केली. त्यानंतर आता फसवणुकीचा गुन्हा दाखल करण्यात आला आहे. या प्रकरणाचा पुढील तपास लाचलुचपत प्रतिबंधक विभागाच्या पोलीस उपअधीक्षक निता मिसाळ करत आहेत.
