सायबर चोरट्यांचा हैदोस: पुण्यात ६० लाखांची फसवणूक
महाराष्ट्र न्यूज नेटवर्क
पुणे : पुण्यात सायबर चोरट्यांनी सामान्य नागरिकांना विविध आमिष दाखवून गेल्या आठवड्यात तब्बल ६० लाख २७ हजार १५६ रुपयांची फसवणूक केली आहे. या चार वेगवेगळ्या घटनांची नोंद लोणीकंद, कोंढवा आणि काळेपडळ (कोंढवा) पोलीस ठाण्यांत करण्यात आली आहे.
पहिल्या घटनेत, लोणीकंद येथील ३९ वर्षीय महिलेला ऑनलाईन टास्क पूर्ण करून अतिरिक्त कमाई करण्याचे आमिष दाखवण्यात आले. वेगवेगळ्या टास्कसाठी वेळोवेळी पैसे पाठवण्यास लावून ३२ लाख २ हजार ७०० रुपयांची फसवणूक करण्यात आली. या प्रकरणाचा तपास वाघोली पोलीस ठाण्याचे वरिष्ठ पोलीस निरीक्षक पंडित रेजितवाड करत आहेत.
दुसऱ्या घटनेत, कोंढवा येथील ४७ वर्षीय व्यक्तीला फॉरेक्स ट्रेडिंगमध्ये जास्त परतावा मिळवून देण्याचे आमिष दाखवण्यात आले. गुंतवणुकीसाठी विविध बँक खात्यांवर पैसे घेण्यात आले, मात्र त्यानंतर कोणताही परतावा दिला नाही. या प्रकारात १२ लाख ३४ हजार ४५६ रुपयांची फसवणूक करण्यात आली. याप्रकरणाचा तपास पोलीस निरीक्षक (गुन्हे) अब्दुल रऊफ शेख करत आहेत.
तिसऱ्या घटनेत, हांडेवाडी येथील ३६ वर्षीय व्यक्तीला शेअर मार्केट ट्रेडिंगमध्ये जास्त परतावा मिळवून देण्याचे आमिष दाखवण्यात आले. त्याच्या बँक खात्यातून ११ लाख ७६ हजार रुपये ट्रान्सफर करून घेत त्याची फसवणूक करण्यात आली. याप्रकरणाचा तपास वरिष्ठ पोलीस निरीक्षक मानसिंग पाटील करत आहेत.
चौथ्या घटनेत, उंड्री येथील ३८ वर्षीय महिलेला पार्ट-टाईम जॉब करून जास्त नफा मिळवून देण्याचे आमिष दाखवून ४ लाख १७ हजार रुपयांची फसवणूक करण्यात आली.
सायबर गुन्ह्यांच्या वाढत्या प्रमाणामुळे नागरिकांनी कोणत्याही अनोळखी व्यक्तीवर विश्वास ठेवू नये, तसेच संशयास्पद आर्थिक व्यवहार त्वरित पोलीस ठाण्यात कळवावेत, असे आवाहन पोलिसांकडून करण्यात आले आहे.
