तीन घटनांत १.६२ लाखांचा ऐवज लंपास : नागरिकांमध्ये भीतीचे वातावरण
महाराष्ट्र न्यूज नेटवर्क
पुणे : पुणे शहरात धमकावून लुटमारीच्या घटनांमध्ये वाढ होत असून, तीन वेगवेगळ्या घटनांमध्ये तब्बल १ लाख ६२ हजार ८०० रुपयांचा ऐवज चोरट्यांनी लंपास केला. या घटना वारजे, शिवाजीनगर आणि हडपसरमधील काळेपडळ परिसरात घडल्या.
शिवाजीनगर भागातील नाना-नानी पार्कजवळ एका तरुणाला मारहाण करून त्याच्याकडील सोनसाखळी आणि रोकड लुटण्यात आली. मंगळवारी (दि. ११) मध्यरात्री फिर्यादी तरुण शिवाजीनगर भागातून जात असताना नाना-नानी पार्कजवळील सार्वजनिक स्वच्छतागृहात गेला.
त्यावेळी एका चोरट्याने त्याला धमकावून गळ्यातील ३२ हजार रुपयांची सोनसाखळी काढून घेतली आणि मारहाण करून १२०० रुपये ऑनलाइन ट्रान्सफर करण्यास भाग पाडले. तसेच जिवे मारण्याची धमकी देत चोरटा पसार झाला. याप्रकरणी शिवाजीनगर पोलिस ठाण्यात गुन्हा दाखल करण्यात आला असून, पोलिस उपनिरीक्षक माटे पुढील तपास करत आहेत.
वारजे भागात एका ज्येष्ठ नागरिकाला धमकावून ९,६०० रुपयांची रोकड लुटण्यात आली. सोमवारी (दि. १०) रात्री साडेआठच्या सुमारास तक्रारदार देवदर्शनासाठी मंदिरात गेले होते. दर्शनानंतर दुचाकीवरून घरी जात असताना कावेरी हॉटेलजवळील गल्लीत दुचाकीस्वार चोरट्यांनी त्यांना अडवले.
चोरट्यांनी “आम्हाला शिवी का दिली?” असा बहाणा करत वाद घालण्यास सुरुवात केली आणि त्यानंतर धमकावून त्यांच्या खिशातील ९,६०० रुपयांची रोकड लुटली. याप्रकरणी वारजे माळवाडी पोलिस ठाण्यात गुन्हा दाखल करण्यात आला असून, पोलिस निरीक्षक अर्जुन नाईकवाडे पुढील तपास करत आहेत.
हडपसरमधील काळेपडळ परिसरात चोरट्यांनी एका तरुणाला धमकावून त्याची दुचाकी आणि मोबाइल लुटला. दुचाकीस्वार तरुण काळेपडळ परिसरातून जात असताना चोरट्यांनी त्याला अडवले आणि धमकावून त्याच्याकडील दुचाकी व मोबाइल घेऊन पसार झाले.
याप्रकरणी काळेपडळ पोलिस ठाण्यात तक्रार दाखल झाली असून, सहायक पोलिस निरीक्षक अमित शेटे पुढील तपास करत आहेत.
पोलिसांनी नागरिकांना अशा प्रकारच्या घटनांपासून सावध राहण्याचा आणि संशयास्पद व्यक्तींची माहिती तातडीने पोलिसांना कळवण्याचा सल्ला दिला आहे. तसेच शहरात गस्त वाढवण्याचे आणि लुटारूंवर कारवाई करण्याचे निर्देश वरिष्ठ अधिकाऱ्यांनी दिले आहेत.
