पारदर्शक आणि गतिमान सेवांसाठी पीएमआरडीएचा निर्णय
महाराष्ट्र न्युज नेटवर्क
पुणे : शासनाच्या अधिसूचित सेवा पारदर्शक आणि गतिमान पद्धतीने विहित कालमर्यादेत देण्याच्या उद्देशाने पुणे महानगर प्रदेश विकास प्राधिकरणाने महत्त्वपूर्ण पाऊल उचलले आहे.
त्या अंतर्गत पीएमआरडीएच्या कार्यक्षेत्रात येणाऱ्या एकत्रिकृत विकास नियंत्रण व प्रोत्साहन नियमावली (UDCPR) लागू असलेल्या तसेच २०१८ च्या प्राधिकरण नियमावलीखाली येणाऱ्या उर्वरित क्षेत्रांमध्ये विकास परवानगी, जोते, भोगवटा आणि इतर परवान्यांची प्रक्रिया दि. २६ फेब्रुवारी २०२५ पासून पूर्णतः ऑनलाईन प्रणालीद्वारे राबवली जाणार आहे.
महानगर आयुक्त डॉ. योगेश म्हसे यांनी हा निर्णय घेतला असून, यामुळे कामकाज पारदर्शक व गतिमान होणार आहे. बांधकाम परवानगी प्रक्रियेचे एकत्रिकृत विकास नियंत्रण व प्रोत्साहन नियमावली UDCPR नुसार प्रमाणन करण्याच्या दृष्टिकोनातून बांधकाम परवानगी व्यवस्थापन प्रणाली (Building Plan Management System – BPMS) हे पोर्टल महाराष्ट्र राज्यात लागू करण्यात आले आहे.
शासनाच्या अधिसूचित सेवा पारदर्शक, गतिमान आणि विहित कालमर्यादेत देण्यासाठी महाराष्ट्र लोकसेवा हक्क अधिनियम अमलात असून, या अंतर्गत नागरिकांना घरबसल्या ऑनलाईन शासकीय सेवा देण्याच्या दृष्टीने शासनाचे निर्देश आहेत. त्या अनुषंगाने पीएमआरडीएमध्ये अंमलबजावणी केली जात आहे.
अर्जदारांनी या ऑनलाईन प्रणालीत विकास परवानगीसाठी आवश्यक कागदपत्रांसह आपला प्रस्ताव ऑनलाईन दाखल करावा. दाखल प्रस्तावाची नियमावलीनुसार ऑनलाईन छाननी होऊन, प्राधिकरणाकडील विविध टप्प्यांवरील मान्यतेची कार्यवाही पूर्ण झाल्यावर चलन निर्गत केले जाईल.
अर्जदाराने चलन भरल्यानंतर विकास परवानगी, जोते, भोगवटा आदी प्रमाणपत्र ऑनलाईन स्वरूपात दिले जाईल. यामुळे नागरिकांना कार्यालयात प्रत्यक्ष येण्याची आवश्यकता राहणार नाही. अर्जाच्या स्थितीबाबत माहिती अर्जासोबत नमूद केलेल्या मोबाईल क्रमांकावर या ऑनलाईन प्रणालीच्या माध्यमातून मिळणार आहे.
ही सेवा https://mahavastu.maharashtra.gov.in/ या संकेतस्थळावर दि. २६ फेब्रुवारी २०२५ पासून नागरिकांसाठी उपलब्ध करून देण्यात येणार आहे. ऑनलाईन अर्ज करताना अडचणी आल्यास, प्राधिकरणाच्या विकास परवानगी विभागाला भेट द्यावी. तिथे ऑनलाईन अर्ज करण्यासाठी नागरिकांना सर्वतोपरी सहकार्य केले जाणार असल्याचे महानगर आयुक्त डॉ. योगेश म्हसे यांनी स्पष्ट केले आहे.
