240 अन्न व्यावसायिकांचा सहभाग : अन्न सुरक्षा नियमांबाबत सखोल मार्गदर्शन
महाराष्ट्र न्यूज नेटवर्क
बार्शी : अन्न व औषध प्रशासन विभागाच्या वतीने आयोजित FOSTAC (Food Safety Training and Certification) अन्न सुरक्षा प्रशिक्षण शिबिर दि. 28 फेब्रुवारी 2025 रोजी हॉटेल रामकृष्ण, पोस्ट चौक, बार्शी येथे मोठ्या उत्साहात पार पडले. या शिबिराला तब्बल 240 अन्न व्यावसायिकांनी हजेरी लावून भरघोस प्रतिसाद दिला.
या शिबिराचे अध्यक्षस्थान अन्न व औषध प्रशासन, महाराष्ट्र राज्य, सोलापूरचे सहाय्यक आयुक्त साहेबराव देसाई यांनी भूषवले.तसेच अन्न सुरक्षा अधिकारी (FSO) श्रीमती अस्मिता टोणपे व रेणुका पाटिल यांची प्रमुख उपस्थिती लाभली.
अध्यक्ष साहेबराव देसाई यांनी उपस्थितांना मार्गदर्शन करताना सांगितले की, “FOSTAC प्रशिक्षण अन्न व्यावसायिकांसाठी अत्यंत महत्त्वाचे आहे. अन्न सुरक्षा आणि दर्जा राखण्यासाठी व्यवसायिकांनी FSSAI च्या मार्गदर्शक तत्त्वांचे पालन करणे आवश्यक आहे.
भविष्यात अन्न परवाना नूतनीकरण करताना आणि Hygiene Rating Certificate मिळवताना हे प्रमाणपत्र अनिवार्य असेल. त्यामुळे सर्व अन्न व्यावसायिकांनी हे प्रशिक्षण पूर्ण करावे.” तसेच, त्यांनी FOSTAC प्रशिक्षणाच्या विविध पातळ्यांविषयी माहिती दिली.
त्यांनी स्पष्ट केले की, Basic, Advanced आणि Special प्रकारातील प्रशिक्षण व्यवसायाच्या स्वरूपानुसार निवडता येते. हॉटेल, रेस्टॉरंट, किराणा दुकानदार, दुग्ध व्यवसायिक, बेकरी आणि मिठाई व्यावसायिक यांना या प्रशिक्षणाचा मोठा फायदा होईल.
अन्न सुरक्षा अधिकारी अस्मिता टोणपे यांनी FOSTAC प्रशिक्षणाचे महत्त्व स्पष्ट करताना, अन्न सुरक्षा कायदे, खाद्य पदार्थ हाताळण्याच्या योग्य पद्धती, HACCP प्रणाली आणि व्यवसायातील सुरक्षा मानके याविषयी सविस्तर माहिती दिली.
त्या म्हणाल्या, “FOSTAC प्रशिक्षणामुळे अन्न व्यवसायिकांना त्यांच्या व्यवसायात सुरक्षितता आणि दर्जा राखण्यास मदत होईल. ग्राहकांचा विश्वास संपादन करण्यासाठी अन्न सुरक्षा नियमांचे पालन करणे अत्यंत महत्त्वाचे आहे.”
या शिबिरात FOSTAC ट्रेनर राहुल भालेकर यांनी स्वच्छता व आरोग्य, स्थान व परिसर, अन्न सुर्षेच्या इतर बाबी, साधन सामग्रीव भांडी, सुविधा, कर्मचाऱ्यांकरता सुविधा व प्रसाधनगृह, हवेची शुद्धता व वायुविजन, प्रकाश व्यवस्था, कच्चे अन्न पदार्थ प्राप्त करणे यावर प्रशिक्षण देण्यात आले आणि अन्न प्रदूषण टाळण्यासाठीच्या उपाययोजनांबाबत सविस्तर माहिती दिली.
या शिबिरात सहभागी झालेल्या सर्व 240 अन्न व्यावसायिकांना FSSAI तर्फे अधिकृत FOSTAC Training Certificate लवकरच प्रोप्रायटर च्या ईमेल वर ऑनलाईन पद्धतीने पाठवण्यात येणार आहे. प्रशिक्षण पूर्ण करणाऱ्या व्यावसायिकांनी भविष्यात FDA विभागाने असे उपयुक्त उपक्रम सातत्याने राबवावेत, अशी मागणी केली.
शिबिराच्या यशस्वी आयोजनामुळे बार्शी व परिसरातील हॉटेल, किराणा, बेकरी, दुग्धजन्य पदार्थ विक्रेते, मिठाई व्यावसायिक आणि इतर अन्न व्यावसायिकांमध्ये समाधानाचे वातावरण होते. उपस्थितांनी FOSTAC प्रशिक्षणामुळे अन्न व्यवसाय अधिक सुरक्षित आणि दर्जेदार करण्यास मदत होईल, अशी प्रतिक्रिया दिली.
कार्यक्रमाच्या शेवटी अन्न सुरक्षा अधिकारी रेणुका पाटील यांनी उपस्थितांचे आभार मानले आणि FOSTAC प्रशिक्षणामुळे अन्न व्यवसायात शाश्वत सुधारणा घडतील, असा विश्वास व्यक्त केला.
