मामाच्या मदतीने तरुणाने चोरट्याला पकडून पोलिसांच्या हवाली केले
महाराष्ट्र न्यूज नेटवर्क
पुणे : कामावरून सुटल्यावर भर दुपारी फॉरेस्ट पार्क रोडवरून जाणाऱ्या तरुणाला अडवून तिघांनी मारहाण करून त्याच्या खिशातील रोकड जबरदस्तीने चोरली. या तरुणाला मारहाण करत असताना पाठीमागून आलेल्या मामाच्या मदतीने एका चोरट्याला पकडून पोलिसांच्या हवाली करण्यात आले.
संतोष किशन राठोड (वय २१, रा. सुदामनगर, धानोरी) असे अटक केलेल्या गुन्हेगाराचे नाव आहे. त्याच्या दोन अल्पवयीन साथीदारांविरुद्ध जबरी चोरीचा गुन्हा दाखल करण्यात आला आहे.याबाबत अतुल निवृत्ती पाटील (वय २१, रा. फॉरेस्ट पार्क रोड, लोहगाव) यांनी विमानतळ पोलीस ठाण्यात फिर्याद दिली आहे.
हा प्रकार लोहगावमधील एअर फोर्स संरक्षण भिंतीलगत फॉरेस्ट पार्क रोडवर रविवारी दुपारी साडेचार वाजता घडला. पोलिसांनी दिलेल्या माहितीनुसार, अतुल पाटील हे गुगल कंपनीमध्ये काम करतात.
कामावरून सुटल्यावर ते दुचाकीवरून फॉरेस्ट पार्क रोडवरून दुपारी साडेचार वाजता घरी जात होते. यावेळी दुचाकीवरून तिघेजण आले. त्यांनी अतुल पाटील यांना अडवून चाकूचा धाक दाखवून खिशातील पाकिटामधील ७०० रुपये जबरदस्तीने काढून घेतले. त्यांना लाथाबुक्क्यांनी मारहाण करू लागले.
त्याचवेळी त्यांचे मामा नंदकुमार खांदवे मुलांना शाळेतून घेऊन घरी जात होते. अतुल पाटील यांना मारहाण होत असल्याचे पाहून ते थांबले. “का मारहाण करता?” असे विचारले असता चोरट्यांनी त्यांनाही मारहाण करण्यास सुरुवात केली.
तेव्हा दोघांनी मिळून चोरट्यांपैकी एकाला पकडून ठेवले, तर अन्य दोघे पळून गेले. पोलीस उपनिरीक्षक अक्षय सोनवणे या प्रकरणाचा तपास करत आहेत.
