गहाळ झालेल्या तीन तोळ्यांच्या मंगळसूत्राचा शोध : समर्थ पोलिसांची कामगिरी
महाराष्ट्र न्यूज नेटवर्क
पुणे : रिक्षातून प्रवास करताना गहाळ झालेले तीन तोळ्यांचे मंगळसूत्र समर्थ पोलिसांच्या तत्पर तपासामुळे ज्येष्ठ महिलेला परत मिळाले. पोलिसांनी सीसीटीव्ही कॅमेऱ्यांद्वारे रिक्षाचालकाचा शोध घेतला.
कोंढवा परिसरातील एका सोसायटीत राहणाऱ्या राधा अशोक अंकम (वय ६६) या रिक्षाने प्रवास करत होत्या. कसबा पेठेतील फडके हौद चौकातून त्या रिक्षाने निघाल्या. रास्ता पेठेतील पॉवर हाऊस चौकात त्या उतरल्या.
प्रवासादरम्यान त्यांचे तीन तोळ्यांचे मंगळसूत्र गहाळ झाल्याचे लक्षात आले. त्यानंतर त्या समर्थ पोलीस ठाण्यात गेल्या आणि मंगळसूत्र गहाळ झाल्याची तक्रार दिली. समर्थ पोलीस ठाण्याचे वरिष्ठ पोलीस निरीक्षक उमेश गित्ते यांनी त्यांना धीर दिला आणि रिक्षाचालकाचा शोध घेण्याचे आदेश दिले.
त्यानंतर तपास पथकातील पोलीस उपनिरीक्षक जालिंदर फडतरे आणि पोलीस अंमलदार यांनी रिक्षाचालकाचा शोध घेण्यास सुरुवात केली. फडके हौद चौक ते रास्ता पेठेतील पॉवर हाऊस चौक दरम्यान असलेल्या सीसीटीव्ही कॅमेऱ्यांचे चित्रिकरण तपासले.
अंकम ज्या रिक्षातून प्रवास करत होत्या, त्या रिक्षाचा क्रमांक एका ठिकाणी चित्रिकरणात आढळून आला. त्या क्रमांकावरून चालकाचा शोध घेण्यात आला. तेव्हा रिक्षा भीमा रमेश भोजेय चालवत असल्याचे आढळले.
रिक्षा साफ करताना भोजेय याला मंगळसूत्र सापडले. भोजेय मूळचा गुजरातचा असून त्याने हे मंगळसूत्र निगडीतील नातेवाईक भरत सोलंकी यांना दिले होते. सोलंकी हे समर्थ पोलीस ठाण्यात आले आणि त्यांनी तीन तोळ्यांचे मंगळसूत्र पोलिसांना परत केले.
त्यानंतर पोलिसांनी तक्रारदार अंकम यांच्याशी संपर्क साधून त्यांना मंगळसूत्र परत केले. मंगळसूत्र परत मिळाल्याने अंकम यांनी आनंद व्यक्त केला. पोलिसांच्या तत्परतेचे कौतुक करून त्यांनी आभार मानले.
