हवालदाराच्या घरातून चोरून नेले २१ तोळे सोन्याचे दागिने, वानवडी पोलिसांनी केली अटक
महाराष्ट्र न्यूज नेटवर्क
पुणे : लष्कराच्या हवालदाराच्या घरातून २१ तोळे सोन्याचे दागिने चोरून पळून गेलेल्या भगोड्या जवानाचा थेट बंगळुरुहून मागोवा घेऊन वानवडी पोलिसांनी साताऱ्यातून अटक केली. आरोपीकडून तसेच दिल्लीतील सोनारकडे विक्री केलेले १६ तोळे सोन्याचे दागिने जप्त करण्यात आले आहेत.
आरोपीचे नाव आहे अमरजीत विनोदकुमार शर्मा (वय ३०, रा. बघेल, ता. बदसर, जि. हमिरपूर, हिमाचल प्रदेश). अमरजीत शर्मा हा लष्करात जवान होता. सेवा कालावधी पूर्ण न करता तो लष्करातून पसार झाल्याने त्याला भगोडा घोषित करण्यात आले आहे. लष्करात काही काळ असल्याने त्याला सैनिकांचे राहणीमान आणि त्यांच्या राहण्याच्या पद्धतीची माहिती होती. त्याचा गैरफायदा घेऊन त्याने घरफोडी केली होती.
वानवडी परिसरात राहणारे लष्करातील जवान के. एम. वादीवेल्लू (वय ३५) यांची पत्नी कामानिमित्त बाहेर गेली होती. त्यावेळी शर्मा यांनी त्यांच्या घराचे कुलूप तोडून कपाटातील २१ तोळे सोन्याचे दागिने चोरून नेले होते.
घरफोडीचा गुन्हा दाखल झाल्यानंतर पोलिसांनी परिसरातील वानवडी, लष्कर, गोळीबार मैदान चौक, मंगळवार पेठ, खडकी, बंडगार्डन, विमाननगर, पुणे रेल्वे स्टेशन परिसर यासह सुमारे २० किमी परिसरातील १२० सीसीटीव्ही कॅमेऱ्यांचे फुटेज तपासले. डाटा विश्लेषणानंतर संशयित चोरटा ओळखला गेला. तो पुणे स्टेशन येथील शेठ मोरारजी गोकुळदास सॅनेटोरियम आणि धर्मशाळा येथे राहत असल्याची माहिती मिळाली.
तेथील लॉजवर त्याने दिलेले आधार कार्ड आणि मोबाईल नंबर यावरून तो अमरजीत शर्मा असल्याचे उघड झाले. तांत्रिक तपासात तो उत्तर प्रदेश, अंबाला, जोधपूर, हिमाचल प्रदेश, दिल्ली अशा ठिकाणी वास्तव्य करत असल्याची माहिती मिळाली.पोलिस अंमलदार अमोल गायकवाड आणि विष्णु सुतार यांना माहिती मिळाली की, तो बंगळुरुत गेला आहे. त्याबरोबर पोलिस पथक बंगळुरुकडे रवाना झाले.
तो बंगळुरुहून बेळगावकडे बसने रवाना झाल्याची माहिती मिळाल्यानंतर पोलिसांनी त्याचा पाठलाग सुरु केला. बेळगाव येथे तपासणी करत असताना तो बसने साताऱ्याकडे जात असल्याचे दिसून आले. पोलिसांनी बेळगावहून त्याचा पाठलाग करून ३० मार्च रोजी पहाटे साताऱ्यातील बसमधून त्याला ताब्यात घेतले.
ताब्यात घेतलेल्या आरोपीकडून २३,६०० रुपये, ४ मोबाईल, आमीर्चे कपडे, आधार कार्ड आणि स्टीलची कटावणी अशी सामग्री मिळाली. चौकशीत त्याने घरफोडी केल्याची कबुली दिली. चोरी केलेले सोन्याचे दागिने हडपसर येथील सोनाराला विकल्याचे सांगितले.
पोलिसांनी करण सत्यप्रकाश डागर (वय २८, रा. बी टी कवडे रोड, घोरपडी) या सराफाला अटक करून त्याच्याकडून सोन्याचे दागिने जप्त केले. चोरी करून हिमाचल प्रदेशला जाताना त्याने दिल्ली येथे आर्मीचे कार्ड दाखवून एका सराफाकडे सोने गहाण ठेवून पैसे घेतले होते.
पोलिसांनी त्याला ही गोष्ट सांगितल्यावर त्याने गहाण ठेवलेले सोने हजर केले. त्याच्याकडून १३ लाख ७७ हजार रुपयांचे एकूण १६२ ग्रॅम दागिने जप्त करण्यात आले आहेत. पोलिस उपनिरीक्षक धनाजी टोणे यांच्याकडे तपासाची जबाबदारी आहे.
ही कामगिरी पोलीस उपायुक्त डॉ. राजकुमार शिंदे, सहायक पोलीस आयुक्त धन्यकुमार गोडसे यांच्या मार्गदर्शनाखाली वानवडी पोलीस ठाण्याचे वरिष्ठ पोलीस निरीक्षक सत्यजीत आदमाने, पोलीस निरीक्षक (गुन्हे) गोविंद जाधव, पोलीस उपनिरीक्षक धनाजी टोणे, पोलीस अंमलदार दया शेगर, महेश गाढवे, अमोल पिलाणे, अतुल गायकवाड, अमोल गायकवाड, विष्णु सुतार, गोपाळ मदने, यतीन भोसले, सोमनाथ कांबळे, अभिजित चव्हाण, बालाजी वाघमारे यांच्या मेहनतीने शक्य झाली आहे.
पोलिसांच्या कामगिरीचे कौतुक
लष्करी जवानाच्या घरातील घरफोडीचा गुन्हा उघडकीस आणल्याने लष्कराच्या दक्षिण मुख्यालयाचे प्रमुख लेफ्टनंट जनरल धीरज सेठ यांनी पोलिसांच्या कामगिरीचे कौतूक केले.
