नजर चुकवून पत्नीच्या मदतीने केली होती चोरी : वारजे माळवाडी पोलिसांनी केली अटक
महाराष्ट्र न्युज नेटवर्क
पुणे : वारजे माळवाडी येथील भाजीपाला, बांगड्या व मसाल्याचे पदार्थ विक्री करणाऱ्या दुकानातून दागिने असलेली पर्स चोरीला गेली होती. ही चोरी पत्नीच्या मदतीने करणाऱ्या एका सराफाला वारजे माळवाडी पोलिसांनी अटक केली आहे.
अटक करण्यात आलेल्या चोरट्याचे नाव संपूर्णानंद परमानंद वर्मा (वय ४३, रा. बालाजी बिल्डिंग, नेहरूनगर, पिंपरी) असे आहे. तो सोन्याचे दागिने घडविण्याचे काम करतो. काही काळ त्याने सराफी व्यवसायही केला होता, मात्र तो चालला नाही. त्यानंतर पत्नीच्या मदतीने त्याने ही चोरी केल्याचे निष्पन्न झाले आहे.
याबाबत शमशाद लाला शेख (वय ४०, रा. सहयोगनगर, वारजे) यांनी वारजे पोलिसांकडे फिर्याद दिली होती. त्यांचे अष्टविनायक चौक येथे भाजीपाला, बांगड्या व मसाल्याचे पदार्थ विक्रीचे दुकान आहे.
२२ मार्च रोजी त्यांचा मुलगा मसाले आणण्यासाठी मार्केटयार्डला गेला होता, त्यामुळे सायंकाळी त्या दुकानात एकट्याच होत्या त्यांनी पर्समध्ये सोन्याचे दागिने व २ लाख रुपये रोख रक्कम ठेवली होती.
दुकानात ग्राहकांची गर्दी झाली होती आणि शेजारील दुकानदारही मदतीला आले होते. याच दरम्यान, एक महिला बांगड्या पाहण्यासाठी काउंटरजवळ आली. तिने बांगड्या पाहिल्या आणि “सासूसाठी मोठ्या साइजच्या बांगड्या हव्यात” असे सांगितले.
शेख यांनी तिला, “सासूला घेऊन या” असे सांगितले. त्यावर तिने, “सासू कुठे आहे ते पाहते,” असे म्हणून घाईघाईने दुकानातून निघून गेली. शेख यांनी बांगड्यांचा गठ्ठा पुन्हा रॅकमध्ये ठेवण्यासाठी गेल्यावर लक्षात आले की, दागिने आणि रोख रक्कम असलेली पर्स गायब झाली आहे.
त्यामध्ये २ लाख रुपये रोख आणि सोन्याचे दागिने असे एकूण ४ लाख ५७ हजार रुपयांचा ऐवज चोरीला गेला होता. या गुन्ह्याची माहिती मिळाल्यानंतर वरिष्ठ पोलीस निरीक्षक विश्वजीत काईगडे यांनी पोलीस उपनिरीक्षक संजय नरळे यांच्या नेतृत्वाखाली एक विशेष पथक तयार केले.
सुरुवातीला ज्या व्यक्तींवर संशय होता, त्यांच्याकडे चौकशी करण्यात आली, मात्र त्यातून काही निष्पन्न झाले नाही. त्यानंतर उत्तमनगर, वारजे, नळस्टॉप, निगडी, भोसरी, पिंपरी या परिसरांतील सीसीटीव्ही कॅमेऱ्यांची तपासणी व तांत्रिक विश्लेषण करण्यात आले.
पोलिस अंमलदार अमित शेलार यांच्या मिळालेल्या माहितीच्या आधारे पोलीस उपनिरीक्षक नरळे यांच्या पथकाने वारजेतील अतुलनगर परिसरातील विनायक हॉस्पिटलसमोर सापळा रचून संपूर्णानंद वर्मा याला अटक केली.
वर्मा स्वतः सराफ असून, त्याने आपल्या पत्नीच्या मदतीने ही चोरी केल्याचे निष्पन्न झाले आहे. पोलिसांकडून त्याच्या पत्नीचा शोध सुरु आहे. वर्मा याच्याकडून २ लाख रुपये रोख, २५० ग्रॅम चांदीचे दागिने आणि ६७ ग्रॅम सोन्याचे दागिने असा एकूण ४ लाख २७ हजार रुपयांचा ऐवज जप्त करण्यात आला आहे.
न्यायालयीन प्रक्रिया पूर्ण झाल्यानंतर तो ऐवज फिर्यादींना परत करण्यात येणार आहे.ही कामगिरी पोलीस उपायुक्त संभाजी कदम, सहायक पोलीस आयुक्त भाऊसाहेब पटारे यांच्या मार्गदर्शनाखाली वरिष्ठ पोलीस निरीक्षक विश्वजीत काईगडे, पोलीस निरीक्षक (गुन्हे) निलेश बडाख, पोलीस उपनिरीक्षक संजय नरळे, पोलीस अंमलदार अर्जुन पवार, संजीव कळंबे, अमित शेलार, शरद पोळ, सागर कुंभार, बालाजी काटे, निखिल तांगडे, गोविंद कपाटे, अमित जाधव, योगेश वाघ, ज्ञानेश्वर चित्ते व गणेश शिंदे यांनी पार पाडली.
