विघ्नेश्वर बँकेचा संचालकच गुन्हेगार : १०० ते १५० बँक खात्यांचा वापर, उच्च शिक्षितांचा सहभाग
महाराष्ट्र न्यूज नेटवर्क
पुणे : शेअर मार्केट ट्रेडिंगमध्ये गुंतवणूक करून जादा परतावा मिळविण्याच्या आमिषाने कोट्यवधींची फसवणूक करणाऱ्या रॅकेटचा भंडाफोड करण्यात पुण्यातील सायबर पोलिसांना यश आले आहे. हे रॅकेट वाघोली येथून चालवले जात असून त्यात विघ्नेश्वर मल्टीस्टेट बँकेच्या संचालकाचा आणि तांत्रिक कर्मचाऱ्याचा सहभाग आढळून आला आहे. देशभरातील असे २९ गुन्हे उघडकीस आणण्यात सायबर पोलिसांना यश आले आहे.
वाघोली परिसरातील विघ्नेश्वर मल्टीस्टेट को-ऑप बँकेचा संचालक गोविंद सूर्यवंशी, तर दुसरा आरोपी रोहित कंबोज हे या बँकेत तांत्रिक काम करत आहेत. त्यांनी बँकेतील खात्यांचा वापर फसवणुकीसाठी केला. तसेच आलेले पैसे काढून ते नवीन खात्यांमध्ये टाकून, त्याद्वारे युएसडीटी (USDT) तयार करून क्रिप्टो करन्सी खरेदीसाठी वापरण्यात आल्याचे उघड झाले आहे.
गोविंद सूर्यवंशी (रा. वाघोली, मूळ रा. हिंगोली), रोहित कंबोज (रा. वाघोली, मूळ रा. पंजाब), ओमकार भवर (रा. वाघोली, मूळ रा. हिंगोली), जब्बरसिंह पुरोहित (रा. चर्‍होली, मूळ रा. धारावी, मुंबई), केतन भिवरे (रा. खराडी) आणि निखिल ऊर्फ किशोर सातव (रा. वाघोली) अशी अटक करण्यात आलेल्यांची नावे आहेत.
शेअर मार्केटमध्ये इन्व्हेस्टमेंटबाबत अनन्या गुप्ता या महिलेने संपर्क करून, वेगवेगळ्या व्हॉट्सअ‍ॅप ग्रुपमध्ये सहभागी करून घेतले. शेअर मार्केट ट्रेडिंगमध्ये गुंतवणूक करून चांगला परतावा मिळेल, असे सांगून तिने १ कोटी ६० लाख रुपये वेळोवेळी भरायला सांगून फसवणूक केली होती.
या गुन्ह्याचा तपास करत असताना, पुण्यातील वाघोली येथील आयडीएफसी बँक खात्यात १७ मार्च २०२५ रोजी ५ लाख ८२ हजार रुपयांची रक्कम चेकद्वारे काढल्याचे निष्पन्न झाले होते. तेव्हा क्षणाचाही विलंब न लावता सायबर पोलिसांनी बँक खात्याचा धारक केतन भिवरे याला ताब्यात घेतले.
त्याचे बँक खाते व मोबाईल क्रमांक यांची तांत्रिक तपासणी केल्यावर, त्यात गोविंद सूर्यवंशी, रोहित कंबोज, ओमकार भवर, जब्बरसिंह पुरोहित यांचा सहभाग असल्याचे आढळून आले. त्यामुळे त्यांनाही तात्काळ ताब्यात घेण्यात आले.
गोविंद सूर्यवंशी हा विघ्नेश्वर मल्टीस्टेट को-ऑप बँकेचा संचालक आहे. रोहित कंबोज हा बँकेच्या तांत्रिक कामात असल्याने त्याचा फायदा घेतला. हे दोघेही बी.टेक उच्च शिक्षित असून, त्यांचे डिगीव्हेंटरी, वननेस, रजत सेल अशा नावाच्या डिजिटल मार्केटिंग कंपन्या आहेत.
सूर्यवंशी व रोहित कंबोज हे दोघेही क्रिप्टो करन्सी व्यवहारांमध्ये सक्रिय असून, त्यांनी अनेक युएसडीटी आरोपी जब्बरसिंह पुरोहित याला दिल्याचे तपासात निष्पन्न झाले आहे. तसेच, गुन्ह्यातील बँक खाती बनवून त्यांचा पुरवठा करणारा आरोपी निखिल ऊर्फ किशोर सातव यालाही पोलिसांनी अटक केली आहे.
या सहा जणांचा गुन्ह्यातील सहभाग निष्पन्न झाल्याने, त्यांना अटक करून न्यायालयात हजर करण्यात आले. न्यायालयाने त्यांना एकूण १२ दिवसांची पोलिस कोठडी मंजूर केली आहे. या आरोपींनी सायबर गुन्हे करताना सुमारे १०० ते १५० बँक खात्यांचा वापर केला असून, नॅशनल सायबर पोर्टलवर त्यांच्या विरोधात वेगवेगळ्या राज्यांमध्ये एकूण २९ गुन्हे दाखल आहेत.
त्यामुळे पुणे सायबर पोलिसांनी भारतातील २९ गुन्ह्यांचा छडा लावण्यात यश मिळवले आहे. तपासात आरोपींचे दुबई, गुजरात, पश्चिम बंगाल या ठिकाणांशी कनेक्शन असल्याचेही निष्पन्न झाले आहे.
ही कारवाई पोलीस आयुक्त अमितेशकुमार, सह पोलीस आयुक्त रंजनकुमार शर्मा, अपर पोलीस आयुक्त शैलेश बलकवडे, पोलीस उपायुक्त विवेक मासाळ, सहायक पोलीस आयुक्त मच्छिंद्र खाडे यांच्या मार्गदर्शनाखाली, वरिष्ठ पोलीस निरीक्षक स्वप्नाली शिंदे, पोलीस उपनिरीक्षक संदीप कदम, तुषार भोसले, पोलीस हवालदार चव्हाण, मुंढे, कोंडे, संदीप पवार, पोलीस अंमलदार दिनेश मरकड, यादव, नागटिळक, सचिन शिंदे, हवालदार जमदाडे, सोनुने तसेच चतु:श्रृंगी पोलीस ठाण्यातील पोलीस उपनिरीक्षक मेमाणे यांनी केली आहे.
