फसवणूक करणार्‍याला मुंबईहून पकडून आणले पुण्यात : त्यांच्यावर मारहाणीचा गुन्हा
महाराष्ट्र न्यूज नेटवर्क
पुणे : महाराष्ट्र बेरोजगार परिषदेमार्फत कर्ज मंजूर करून देण्याच्या नावाखाली ३९ लोकांकडून एकूण १५ लाख ७८ हजार रुपये शुल्क म्हणून घेऊन फसवणूक केल्याचा प्रकार उघड झाला आहे. या प्रकरणातील मुख्य आरोपी शोधन भावे मुंबईत असल्याचे समजल्यावर, फसवणूक झालेल्या लोकांनी त्याला पकडून येरवडा पोलिसांकडे आणले. मात्र, पोलिसांनी भावेचे अपहरण व मारहाण केल्याप्रकरणी या नागरिकांविरुद्ध गुन्हा दाखल केला आहे. तसेच, फसवणुकीप्रकरणी शोधन भावे याच्यासह आणखी पाच जणांविरुद्ध गुन्हा दाखल करण्यात आला आहे.
याबाबत लवीना मरियन (वय ४७, रा. आदर्शनगर सोसायटी, कल्याणीनगर) यांनी येरवडा पोलिस ठाण्यात दिलेल्या तक्रारीनुसार, पोलिसांनी आशा चौधरी, वैष्णवी कुलकर्णी-पाठक, अनुप सुभेदार, शोधन भावे आणि राजेश कानभास्कर यांच्याविरुद्ध गुन्हा दाखल केला आहे.
ही फसवणूक “सम्राट अशोक सेना” या संस्थेद्वारे महाराष्ट्र बेरोजगार परिषदेच्या कार्यालयात नोव्हेंबर २०२४ ते १ एप्रिल २०२५ दरम्यान घडली. पोलिसांच्या माहितीनुसार, शोधन भावे व इतरांनी संगनमत करून कर्ज मंजूर करून देण्याचे आमिष दाखवले.
त्यांनी लोकांकडून कागदपत्रे घेतली व कर्ज फाईल करण्याचे शुल्क म्हणून पैसे उकळले. मात्र, त्यांनी कोणालाही कर्ज मंजूर करून न देता लोकांची फसवणूक केली. फिर्यादीसह ३९ लोकांकडून एकूण १५ लाख ७८ हजार रुपये घेतल्याचे निष्पन्न झाले आहे.
पोलिसांनी या प्रकरणी दोन महिलांना अटक केली आहे. पोलीस उपनिरीक्षक नंदकुमार केकाण या प्रकरणाचा तपास करत आहेत. या फसवणुकीच्या पार्श्वभूमीवर शोधन अनिल भावे (वय ५७, रा. करण क्लारिसा सोसायटी, वारजे) यांनी येरवडा पोलिस ठाण्यात तक्रार दाखल केली आहे.
या तक्रारीवरून पोलिसांनी वैष्णवी पाठक (वय ३५), दिनेश येवले (वय ४०), अविनाश पाठक (वय ४०), आशपाक कासीम आगा (वय ३५), अमोघन अ‍ॅलेक्स (वय ३६) आणि राजेश शेषनारायण कंट्रोलु (वय ४०) यांच्याविरुद्ध गुन्हा दाखल केला आहे.
ही घटना ९ एप्रिल रोजी दुपारी अडीच वाजण्याच्या सुमारास, मुंबईतील अंधेरी येथील हॉटेल कलिंगा ते पुण्यातील गुंजन चौक या दरम्यान घडली. कर्ज न मिळाल्याने त्रस्त झालेल्या लोकांनी शोधन भावे याचा शोध घेऊन त्याला अंधेरीतील हॉटेलमधून पकडले आणि पुण्यात आणले.
गुंजन चौकात आणल्यानंतर त्याला मारहाण करण्यात आली. या प्रकरणात पोलिसांनी तिघांना अटक केली आहे. सहायक पोलीस निरीक्षक सुनील सोळुंके तपास करत आहेत.
