सहकारनगर पोलिसांची कामगिरी, धनकवडीतील दोन गुन्हे उघड
महाराष्ट्र न्यूज नेटवर्क
पुणे : पायी जाणाऱ्या नागरिकाला विनाकारण धक्का मारून, पाया पडण्याचा बहाणा करून खिशातील पैसे चोरणाऱ्या दोघा सराईतांना सहकारनगर पोलिसांनी जेरबंद केले.
आस्लम इस्माईल शेख (वय २१, रा. नवीन म्हाडा, सातववाडी, हडपसर) आणि साद अकबर पठाण (वय २३, रा. वेस्टर्न गल्ली, सय्यदनगर, हडपसर) अशी अटक केलेल्यांची नावे आहेत. त्यांच्याकडून दोन गुन्हे उघडकीस आले आहेत.
याबाबत दीपक रामराव मोरे (वय ३७, रा. धनकवडे पाटील टाऊनशिप, धनकवडी) यांनी सहकारनगर पोलीस ठाण्यात फिर्याद दिली आहे. हा प्रकार धनकवडीतील शाहू बँक चौकातील साईबा टी स्टॉलच्या बाजूला ९ एप्रिल रोजी घडला होता.
मोरे हे पायी जात असताना, मोटारसायकलजवळ उभे असलेल्या दोघांनी त्यांच्या पाठीमागून येऊन त्यांना धक्का दिला. धक्का लागल्यामुळे माफी मागण्याच्या बहाण्याने पाया पडत त्यांनी मोरे यांच्या पँटच्या खिशामधील ३० हजार रुपये नकळत काढून घेतले आणि निघून गेले. याबाबतची फिर्याद मोरे यांनी सहकारनगर पोलिसांकडे दिली.
त्याचा तपास करत असताना, घटनेच्या अनुषंगाने पोलिसांनी दोघांना ताब्यात घेऊन चौकशी केली असता त्यांनी गुन्ह्याची कबुली दिली. गुन्ह्यात वापरलेली मोटारसायकल पोलिसांनी जप्त केली आहे.
अधिक चौकशीत, त्यांनी आणखी एका नागरिकाचे १० हजार रुपये अशाच प्रकारे चोरल्याचे निष्पन्न झाले.
कैलाश विश्वनाथ राजहंस (वय ५१, रा. कात्रज गाव) हे १८ ऑक्टोबर २०२४ रोजी सकाळी धनकवडीतील शंकर महाराज मठाजवळून जात असताना, या दोघा चोरट्यांनी त्यांना धक्का देऊन माफी मागण्याचा बहाणा करून त्यांच्या खिशातील १० हजार रुपये चोरले होते.
अपर पोलीस आयुक्त प्रविणकुमार पाटील, पोलीस उपायुक्त स्मार्तना पाटील, सहायक पोलीस आयुक्त राहुल आवारे, सहकारनगर पोलीस ठाण्याचे वरिष्ठ पोलीस निरीक्षक राहुल गौड, पोलीस निरीक्षक (गुन्हे) सुरेखा चव्हाण यांच्या मार्गदर्शनाखाली सहायक पोलीस निरीक्षक सागर पाटील, सहायक पोलीस उपनिरीक्षक बापू खुटवड, पोलीस अंमलदार अमोल पवार, बजरंग पवार, सागर सुतकर, किरण कांबळे, योगेश ढोले, महेश भगत, अमित पदमाळे, बालाजी केंद्रे, चंद्रकांत जाधव, महेश मंडलिक, खंडू शिंदे यांनी ही कामगिरी केली आहे.
