२०२४-२५ मधील सुरू असलेली कामे ऑगस्ट २०२५ पर्यंत पूर्ण करा; २०२५-२६ च्या कामांना ३१ मेपूर्वी मान्यता द्या – जिल्हाधिकारी डूडी यांचे निर्देश
महाराष्ट्र न्यूज नेटवर्क
पुणे : जिल्हा वार्षिक योजनेअंतर्गत २०२४-२५ मधील प्रलंबित कामांची पूर्णता आणि २०२५-२६ या आर्थिक वर्षातील नियोजित कामांचा आढावा जिल्हाधिकारी जितेंद्र डूडी यांच्या अध्यक्षतेखाली घेण्यात आला. संबंधित यंत्रणांनी निर्धारित मुदतीत कामे पूर्ण करण्याच्या सूचनाही यावेळी देण्यात आल्या.
जिल्हाधिकारी कार्यालयाच्या सभागृहात जिल्हा वार्षिक योजना आढावा बैठकीचे आयोजन करण्यात आले होते. यामध्ये जिल्हा परिषदेचे मुख्य कार्यकारी अधिकारी गजानन पाटील, अतिरिक्त मुख्य कार्यकारी अधिकारी चंद्रकांत वाघमारे, जिल्हा नियोजन अधिकारी किरण इंदलकर तसेच विविध विभागांचे प्रमुख अधिकारी उपस्थित होते.
जिल्हाधिकारी जितेंद्र डूडी यांनी सांगितले की, “मागील आर्थिक वर्षात सर्व यंत्रणांनी नियोजनबद्ध काम केल्यामुळे १०० टक्के खर्चाचे उद्दिष्ट साध्य झाले आहे. २०२४-२५ मधील सुरू असलेली कामे ऑगस्ट २०२५ पर्यंत पूर्ण करावीत. २०२५-२६ मधील कामांसाठी ३१ मे २०२५ पर्यंत सर्व मान्यतांची प्रक्रिया पूर्ण करावी व डिसेंबर २०२५ पर्यंत कामे गुणवत्ता राखून पूर्ण करावीत.”
तसेच त्यांनी नमूद केले की, “डिसेंबर अखेरीस पूर्ण झालेल्या कामांची गुणवत्ता तपासणी जानेवारी, फेब्रुवारी व मार्च २०२६ या तीन महिन्यांत करावी. काही कामांची प्रत्यक्ष तपासणी केली जाईल.”
प्रत्येक विभागाने नाविन्यपूर्ण योजनेअंतर्गत एक प्रस्ताव नियोजन विभागास सादर करावा, असेही त्यांनी सांगितले. जिल्हा परिषद मुख्य कार्यकारी अधिकारी गजानन पाटील यांनी सांगितले की, “२०२४-२५ मधील प्रलंबित कामांचे आदेश ३१ मे २०२५ पूर्वी देऊन कामे तात्काळ पूर्ण करावीत.” बैठकीला सर्व संबंधित विभागांचे प्रमुख अधिकारी उपस्थित होते.
