पूर्ववैमनस्यातून खून करून मृतदेह टाकला वरंधा घाटात

ग्रामीण पोलिसांनी १२ तासांत गुन्हा उघडकीस आणून दोघांना केले जेरबंद

महाराष्ट्र न्यूज नेटवर्क

पुणे : पूर्ववैमनस्यातून नातेवाईक असलेल्या तरुणाचा खून करून त्याचे शिर कापून मृतदेह वरंधा घाटात टाकून दिल्याचे उघडकीस आले आहे. ग्रामीण पोलीस दलातील स्थानिक गुन्हे शाखेने केवळ १२ तासांत मृतदेहाची ओळख पटवून गुन्हा उघडकीस आणत दोघांना अटक केली आहे.

संतोष भिकू पिसाळ (वय ४३, रा. साई प्लॅनेट, वडगाव बुद्रुक, ता. हवेली, मूळ रा. रांजे, ता. भोर) आणि अनिकेत चंद्रकांत पिसाळ (वय २९, रा. अनंत सृष्टी, आंबेगाव खुर्द, ता. हवेली) अशी अटक करण्यात आलेल्यांची नावे आहेत.

संतोष उर्फ प्रमोद रघुनाथ पासलकर (वय ४०, रा. सोनल हाइट्स, वडगाव बुद्रुक, ता. हवेली) असे खून झालेल्याचे नाव आहे. संतोष पासलकर आणि संतोष पिसाळ हे नातेवाईक आहेत.
भोर तालुक्यातील शिरगाव येथील जननी माता मंदिराकडे जाणाऱ्या रस्त्यालगत २६ एप्रिल रोजी एका पुरुषाचा शिर नसलेला मृतदेह आढळून आला होता.

जनावरे चरण्यासाठी गेलेल्या एका व्यक्तीला मृतदेह दिसल्यावर त्याने ही माहिती पोलीस पाटीलांना दिली. पोलीस पाटील सुधीर रामचंद्र दिघे (वय ५२, रा. वारवंड, ता. भोर) यांच्या फिर्यादीवरून खुनाचा गुन्हा दाखल करण्यात आला होता.

स्थानिक गुन्हे शाखेचे पथक समांतर तपास करत होते. पोलीस हवालदार अमोल शेडगे यांना बातमीदाराकडून माहिती मिळाली की, संतोष पासलकर दोन दिवसांपासून बेपत्ता आहे. त्याचे नातेवाईक संतोष पिसाळ याच्याशी दोन दिवसांपूर्वी भांडण झाले होते.

जुन्या वादावरून त्यांच्यात पूर्वीपासून राग होता, अशी माहिती मिळाली. पासलकर यांच्या नातेवाईकांकडून मृतदेह संतोष पासलकर याचाच असल्याचे स्पष्ट झाले. संतोष पिसाळ याला ताब्यात घेऊन चौकशी केली असता त्याने आणि त्याच्या साथीदाराने खून केल्याचे निष्पन्न झाले. पोलिसांनी दोघांनाही अटक केली.

ही कामगिरी पोलीस अधीक्षक पंकज देशमुख, अप्पर पोलीस अधीक्षक गणेश बिरादार, विभागीय पोलीस अधिकारी तानाजी बरडे यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर, पोलीस ठाण्याचे निरीक्षक अण्णा पवार, सहाय्यक पोलीस निरीक्षक दत्ताजीराव मोहिते, सहाय्यक फौजदार हनुमंत पासलकर, पोलीस हवालदार अमोल शेडगे, बाळासाहेब खडके, पोलीस अंमलदार मंगेश भगत, धीरज जाधव, धर्मवीर खांडे यांनी केली आहे.