बार्शी पोलिसांची तत्पर कारवाई : तांत्रिक तपासातून गोपाळ पवार यांना दिलासा
महाराष्ट्र न्यूज नेटवर्क
बार्शी : बार्शी शहरातील बुरूड गल्ली येथील रहिवासी गोपाळ बाबासाहेब पवार (वय ३२) यांच्याशी संबंधित ऑनलाइन आर्थिक फसवणूक प्रकरणात बार्शी पोलिसांच्या सायबर युनिटने तात्काळ आणि प्रभावी तपास करत एकूण ₹1.22 लाख रक्कम पीडिताच्या खात्यात यशस्वीरित्या परत जमा केली आहे.
या प्रकरणाची चौकशी बार्शी पोलिस ठाण्याचे पोलीस निरीक्षक बालाजी कुकडे यांच्या मार्गदर्शनाखाली पोलीस कॉन्स्टेबल धनराज फत्तेपुरे आणि पोलीस कॉन्स्टेबल सचिन देशमुख यांनी केली.
गोपाळ पवार हे बांबू वासे विक्रीचा व्यवसाय करतात. दिनांक ५ मे २०२५ रोजी त्यांनी अनोळखी व्यापार्‍याशी संपर्क साधून, त्याच्याकडून बांबू वासे खरेदीसाठी ₹1.22 लाख अ‍ॅडव्हान्स रक्कम ऑनलाइन स्वरूपात ट्रान्सफर केली होती. मात्र, दीर्घ काळानंतरही माल न मिळाल्याने आणि संबंधित इसमाने संपर्क टाळल्याने फसवणुकीचा संशय निर्माण झाला.
गोपाळ पवार यांनी त्वरित सायबर हेल्पलाइन क्रमांकावर संपर्क साधून तक्रार दाखल केली. त्यानंतरही त्या इसमाने दुसऱ्या मोबाईल नंबरवरून पुन्हा पैसे मागितल्यामुळे ही आर्थिक फसवणूक असल्याचे स्पष्ट झाले.
या तक्रारीनंतर बार्शी सायबर युनिटने तपास कार्यवाही सुरू केली. निरीक्षक कुकडे यांच्या मार्गदर्शनाखाली कॉन्स्टेबल फत्तेपुरे आणि देशमुख यांनी मोबाईल क्रमांक, बँक खात्यांची माहिती, तांत्रिक विश्लेषण आदींच्या आधारे नेमकेपणाने तपास केला.
तपासादरम्यान फसवणुकीचे स्पष्ट पुरावे मिळाले. आरोपीच्या खात्यांमधून संबंधित रक्कम ट्रेस करून १२ जून रोजी ती पीडिताच्या खात्यात परत करण्यात आली. रक्कम परत मिळाल्याने गोपाळ पवार यांनी समाधान व्यक्त करत सांगितले, “माझी फसवणूक झालेली रक्कम पोलिसांच्या तत्परतेमुळे मला पुन्हा मिळाली. तपास अतिशय अचूक आणि वेगवान होता.
यासाठी मी बार्शी पोलिस ठाणे व संबंधित अधिकाऱ्यांचे आभार मानतो.” या घटनेनंतर नागरिकांमध्ये बार्शी पोलिसांबद्दलचा विश्वास वाढला आहे. सायबर गुन्ह्यांविरोधातील तत्परता व तांत्रिक कौशल्याबद्दल सर्वत्र प्रशंसा होत आहे.
बार्शी पोलिसांकडून आवाहन करण्यात आले आहे की, सायबर गुन्ह्यांचे प्रमाण वाढत असल्यामुळे कोणताही ऑनलाईन आर्थिक व्यवहार करताना पुरेशी खात्री करूनच व्यवहार करावा. तसेच फसवणुकीचा संशय आल्यास त्वरित १९३० या हेल्पलाइनवर संपर्क साधावा किंवा जवळच्या पोलिस ठाण्यात तक्रार नोंदवावी.
