सहायक पोलीस फौजदार जुगार खेळताना पकडला

विश्रामबाग पोलिसांच्या छाप्यात उघड, तडकाफडकी निलंबनाची कारवाई

महाराष्ट्र न्यूज नेटवर्क

पुणे : नारायण पेठ येथील हरिभाऊ साने वाहनतळावर बुधवारी सायंकाळी विश्रामबाग पोलिसांनी टाकलेल्या छाप्यात जुगार खेळणाऱ्या ३३ जणांना ताब्यात घेण्यात आले. विशेष म्हणजे, या आरोपींमध्ये पोलीस मुख्यालयातील सहायक पोलीस फौजदार महेश महादेव भुतकर यांचाही समावेश होता. त्यांना तातडीने निलंबित करण्यात आले आहे.

महेश भुतकर हे सध्या पोलीस मुख्यालयातील ‘सी’ कंपनीत कार्यरत होते. त्यांच्याविरुद्ध दाखल झालेल्या अहवालानुसार, त्यांनी पोलीस खात्याच्या शिस्तीला आणि प्रतिष्ठेला काळिमा फासल्यामुळे, पोलीस उपायुक्त राजलक्ष्मी शिवणकर यांनी त्यांच्यावर तडकाफडकी निलंबनाची कारवाई केली.

या प्रकरणी पोलीस हवालदार गणेश भुजबळ यांनी विश्रामबाग पोलीस ठाण्यात फिर्याद दिली आहे. त्यानुसार प्रविण काशिनाथ बोदवडे (वय ४४, रा. कात्रज) याच्यासह ३३ जणांविरुद्ध गुन्हा दाखल करण्यात आला आहे. या जुगार अड्ड्याचे संचालन विजय महाडिक करत होता, ज्याच्यावर यापूर्वीही अनेकवेळा कारवाई करण्यात आली आहे.

विश्रामबाग पोलिसांना मिळालेल्या माहितीच्या आधारे, नारायण पेठेतील हरिभाऊ साने वाहनतळाच्या टेरेसवरील खोलीत काही जण ‘रम्मी’ नावाचा पैशावर आधारित जुगार खेळत असल्याची माहिती मिळाली होती. त्यानुसार पोलिसांनी त्या ठिकाणी छापा टाकून ३३ जणांना रंगेहात पकडले. त्यांच्याकडून जुगाराचे साहित्य, रोख रक्कम आणि मोबाईल फोन असा मुद्देमाल जप्त करण्यात आला आहे.

महेश भुतकर यांच्यावरील कारवाईचा अहवाल विश्रामबाग पोलीस ठाण्याचे वरिष्ठ पोलीस निरीक्षक आणि पोलीस मुख्यालयातील राखीव पोलीस निरीक्षक यांनी पोलीस उपायुक्तांना सादर केला होता. त्या आधारे भुतकर यांना निलंबित करण्यात आले असून, अधिक तपास सुरू आहे.