लोहमार्ग पोलिसांनी दोघांकडून हस्तगत केले २ लाखांचे २० मोबाईल
महाराष्ट्र न्युज नेटवर्क
पुणे : रेल्वेगाडीत चढताना गर्दीचा गैरफायदा घेऊन प्रवाशांचे मोबाईल चोरणाऱ्या दोघा चोरट्यांना लोहमार्ग पोलिसांनी पकडले आहे. त्यांच्याकडून १ लाख ९० हजार रुपयांचे २० मोबाईल जप्त केले आहेत.
बुद्धराज मोरपाल बागडी (वय ३२, रा. डिलोदा, ता. जि. बारा, राजस्थान) आणि अमरलाल हंसराज बागडी (वय २२, रा. बडा का बालाजी, ता. जि. बारा, राजस्थान) अशी अटक केलेल्यांची नावे आहेत. मंगळवार पेठेतील सिग्नल चौकात झोपडी टाकून राहणाऱ्या या दोघांच्या झोपडीतून २० मोबाईल जप्त करण्यात आले आहेत.
ऋतुराज दिलीपराव काटकर (वय २६, रा. जगदंबा सोसायटी, वडगाव शेरी) यांचे मित्र संजय मडिया डिन्डोड हे ३० ऑगस्ट रोजी रात्री ९ वाजण्याच्या सुमारास प्लॅटफॉर्म क्रमांक १ वर उभ्या असलेल्या दानापूर एक्सप्रेस गाडीच्या इंजिनकडील बाजूच्या जनरल डब्यात चढत असताना त्यांचा मोबाईल कोणीतरी चोरून नेला होता. त्याची फिर्याद लोहमार्ग पोलिसांकडे दाखल झाली.
या गुन्ह्याचा तपास करीत असताना पोलिसांना माहिती मिळाली की, मंगळवार पेठेतील सिग्नल चौकात काही जण झोपडी टाकून राहतात आणि ते पुण्यातील लोकांचे मोबाईल चोरून आपल्याकडे ठेवतात. त्यानुसार पोलीस पथक सिग्नल चौकात गेले. पोलिसांना पाहून चोरटे पळून जाऊ लागले. पोलिसांनी त्यांचा पाठलाग करून पकडले.
त्यांच्या झोपडीतून १ लाख ९० हजार ४०० रुपयांचे वेगवेगळ्या कंपन्यांचे २० मोबाईल जप्त करण्यात आले. या दोघांकडे अधिक चौकशी केल्यानंतर त्यांनी जुन्या बाजारातून कोणत्याही प्रकारची खात्री न करता मोबाईल विकत घेतल्याचे व कोणत्याही ग्राहकास शुल्लक किंमतीत विकल्याचे निष्पन्न झाले. तसेच मोबाईल चोरी केल्याची कबुलीही दोघांनी दिली.
ही कारवाई पोलीस अधीक्षक अश्विनी सानप, अपर पोलीस अधीक्षक रोहीदास पवार, उपविभागीय पोलीस अधिकारी जयराम पायगुडे यांच्या मार्गदर्शनाखाली वरिष्ठ पोलीस निरीक्षक प्रमोद खोपीकर, पोलीस उपनिरीक्षक यशवंत साळुंके, सहायक पोलीस फौजदार सुनिल कदम, अनिल दांगट, पोलीस हवालदार छाया चव्हाण, निलेश बिडकर, पोलीस अंमलदार सिद्धार्थ वाघमारे, नेमाजी केंद्रे, मारटकर, रेल्वे सुरक्षा बलाकडील निरीक्षक यादव, पोलीस उपनिरीक्षक लाड, आरक्षक युवराज गायकवाड, विशाल माने, रसुल सय्यद यांनी केली आहे.
