मतदार यादीतील गोंधळ व मतचोरीविरोधात लढ्याचा निर्धार
महाराष्ट्र न्युज नेटवर्क
पुणे : मुंबईतील टिळक भवन येथे महाराष्ट्र प्रदेश युवक काँग्रेसची दोन दिवसीय प्रदेश कार्यकारिणी आढावा बैठक उत्साहात सुरू झाली. या बैठकीत मतदार यादीतील गोंधळ आणि मतचोरीविरोधात राज्यभर ठाम लढा उभारण्याचा संकल्प व्यक्त करण्यात आला.
बैठकीस भारतीय युवक काँग्रेसचे सरचिटणीस व महाराष्ट्र प्रभारी अजय छिकारा, प्रदेश युवक काँग्रेसचे नवनियुक्त अध्यक्ष शिवराज मोरे, सहप्रभारी नवज्योत सिंग संधू आणि शांभवी शुक्ला यांनी उपस्थित पदाधिकाऱ्यांना मार्गदर्शन केले. मागील काळातील कामगिरीचा आढावा घेऊन आगामी काळातील युवक काँग्रेसच्या कार्याची दिशा व रूपरेषा निश्चित करण्यात आली.
राज्यातील प्रत्येक विधानसभा क्षेत्रात युवक काँग्रेसचे कार्यकर्ते बूथ स्तरावर जाऊन मतदार यादीची तपासणी करतील. पुढील एक महिन्यात बूथवार सर्व माहिती गोळा करून आवश्यक रणनीती आखली जाईल, जेणेकरून मतदारांना न्याय मिळेल.
भारतीय युवक काँग्रेसचे सरचिटणीस अजय छिकारा म्हणाले, महाराष्ट्र युवक काँग्रेसने बूथ स्तरावर संघटन मजबूत करण्याचे काम हाती घेतले आहे. मतदार यादीतील गोंधळ आणि मतचोरीविरोधात युवक काँग्रेस ठाम लढा देईल. हा लढा लोकशाही मजबूत करण्यासाठी आहे.
महाराष्ट्र प्रदेश युवक काँग्रेस अध्यक्ष शिवराज मोरे यांनी सांगितले, आम्ही बूथ पातळीवर जाऊन प्रत्येक युवकाला सोबत घेणार आहोत. मतदार यादीतील प्रत्येक चुकीविरुद्ध लढा देऊन लोकशाही बळकट करणे हेच आमचे उद्दिष्ट आहे.
या महत्त्वाच्या बैठकीस राष्ट्रीय सरचिटणीस अजय छिकारा, प्रदेशाध्यक्ष शिवराज मोरे, सहप्रभारी नवज्योत सिंग संधू, शांभवी शुक्ला यांसह भारतीय युवक काँग्रेसचे नवनिर्वाचित पदाधिकारी, जिल्हाध्यक्ष, विधानसभा अध्यक्ष व इतर मान्यवर मोठ्या संख्येने उपस्थित होते. मीडिया विभागाचे चेअरमन अक्षय जैन यांनी या संदर्भात सविस्तर माहिती दिली.
