महापालिका भवन येथील पीएमपी बसस्थानकावरील घटना : सोन्याची बांगडी चोरी, साथीदार फरार
महाराष्ट्र न्युज नेटवर्क
पुणे : बसमधून उतरताना मदत करण्याचा बहाणा करून चोरट्याने महिलेच्या हातातील सोन्याची बांगडी चोरी केली. मात्र महिलेच्या आरडाओरड्यानंतर तत्परतेने प्रतिसाद देत बस कंडक्टरने धाडसाने पाठलाग करून चोरट्याला पकडले. ही घटना महापालिका भवन येथील पीएमपी बसस्थानकावर सोमवारी सायंकाळी साडेचार ते पावणे पाच वाजण्याच्या सुमारास घडली.
अटक करण्यात आलेल्या चोरट्याचे नाव लखन सुहास जाधव (वय ३०, रा. सर्वोदय कॉलनी, मुंढवा) असे आहे. त्याचा साथीदार चाँद शेख (रा. मुंढवा) हा मात्र पसार झाला आहे. या प्रकरणी रेणु हाडु साहु (वय ५६, रा. आनंदनगर, सणसवाडी, ता. शिरुर) यांनी शिवाजीनगर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी सणसवाडी येथून पुण्यात येण्यासाठी बसने प्रवास करत होत्या. बस मनपा बसस्थानकावर आल्यानंतर त्या उतरण्यासाठी उठल्या. उजव्या हातात पिशवी धरलेल्या अवस्थेत असताना दोन चोरट्यांपैकी एकाने ‘मदत करतो’ असे सांगत त्यांचा हात पकडला.
तेव्हा फिर्यादी म्हणाल्या, ‘माझी पिशवी पकड’. त्याचवेळी बस कंडक्टरने का थांबलात, उतरत का नाही असा प्रश्न केला. त्यावर फिर्यादी म्हणाल्या, ‘ह्या माणसाने माझा हात पकडून ठेवला आहे’. तोच चोरटा पिशवी सोडून बसबाहेर पळाला. त्या वेळी महिलेने पाहिले असता त्यांच्या हातातील एक तोळ्याची सोन्याची बांगडी गायब असल्याचे लक्षात आले.
त्यांनी आरडाओरडा करताच बस कंडक्टरने तत्परतेने पाठलाग केला. चोरटा रस्त्याच्या डिव्हायडरवरून उडी मारून पळण्याचा प्रयत्न करीत असतानाच बस कंडक्टरने धावत जाऊन त्याला पकडले.
लोकांनी तत्काळ पोलिसांना माहिती दिली.
काही वेळातच शिवाजीनगर पोलिस घटनास्थळी पोहोचले. बस कंडक्टरने पकडलेला चोरटा पोलिसांच्या ताब्यात दिला. या प्रकरणी पोलीस हवालदार दीपक रोमाडे तपास करीत आहेत. दरम्यान, गेल्या काही दिवसांत गर्दीचा फायदा घेऊन पीएमपी बसमध्ये महिलांचे दागिने, पर्स तसेच हातातील बांगड्या चोरण्याच्या घटना वाढल्या आहेत.
अशा चोरीच्या गुन्ह्यांमध्ये मुंढवा परिसरातील काही टोळ्या सक्रीय असल्याचे पोलिस तपासात निष्पन्न झाले आहे.
