बंडगार्डन पोलिसांची उत्कृष्ट कामगिरी : सव्वा तीन लाखांचा मुद्देमाल जप्त
महाराष्ट्र न्युज नेटवर्क
पुणे : साधु वासवानी चौकात थांबलेल्या तरुणाच्या हातातील मोबाईल हिसकावून नेणाऱ्या चोरट्यांचा शोध घेत असताना बंडगार्डन पोलिसांच्या हाती सराईत चोरटे लागले. या तिघांना अटक करून पोलिसांनी ३ लाख २३ हजार रुपयांचा मुद्देमाल जप्त केला आहे.
अटक केलेल्यांमध्ये सोहेल बादशाह खान (वय २०), आयान झाकीर शहा (वय २१) आणि फरहान वसीम शेख (वय २०, तिघेही रा. शिवनेरीनगर, कोंढवा) यांचा समावेश आहे. पोलिसांनी त्यांच्या ताब्यातून १९ मोबाईल फोन आणि एक दुचाकी असा एकूण ३ लाख २३ हजार रुपयांचा माल हस्तगत केला आहे.
या आरोपींनी बंडगार्डन, वानवडी, कोंढवा, मार्केटयार्ड आणि स्वारगेट पोलीस ठाण्याच्या हद्दीत केलेल्या एकूण आठ जबरी चोरीच्या गुन्ह्यांचा उलगडा करण्यात पोलिसांना यश आले आहे. साधु वासवानी चौकात एका तरुणाचा मोबाईल दुचाकीवरून आलेल्या चोरट्यांनी हिसकावून नेला होता.
या घटनेची नोंद बंडगार्डन पोलीस ठाण्यात करण्यात आली होती. प्रकरणाचा तांत्रिक तपास आणि सीसीटीव्ही फुटेजच्या आधारे पोलीस अंमलदार प्रदीप शितोळे, सारस साळवी आणि प्रकाश आव्हाड यांना आरोपी कोंढवा परिसरातील असल्याची माहिती मिळाली. त्यानुसार पोलिसांनी कोंढव्यात शोध घेऊन तिघांना अटक केली.
तपासात त्यांच्या ताब्यातून १९ मोबाईल जप्त करण्यात आले, त्यापैकी ८ मोबाईल संबंधित गुन्हे उघडकीस आले असून उर्वरित मोबाईलचा तपास सुरू आहे. मोबाईल चोरीसाठी वापरलेली दुचाकीही जप्त करण्यात आली आहे.
ही कारवाई अपर पोलीस आयुक्त राजेंद्र बनसोडे, पोलीस उपायुक्त मिलिंद मोहिते, सहायक पोलीस आयुक्त संगिता आल्फान्सो शिंदे, वरिष्ठ पोलीस निरीक्षक संतोष पांढरे आणि पोलीस निरीक्षक निलकंठ जगताप यांच्या मार्गदर्शनाखाली करण्यात आली.
कारवाईत पोलीस उपनिरीक्षक धीरज गुप्ता, मोहन काळे तसेच पोलीस अंमलदार प्रदीप शितोळे, सारस साळवी, प्रकाश आव्हाड, सागर घोरपडे, महेश जाधव, ज्ञानेश्वर बडे, मनिष संकपाळ, मनोज भोकरे, शिवाजी सरक, ज्ञानेश्वर गायकवाड, अवधूत जमदाडे, निलेश पालवे आणि प्रविण पाडाळे यांनी सहभाग घेतला.
