पार्थ पवार यांच्या ‘अमेडिया’ कंपनीने आणखी एका सरकारी जमिनीचा केला अपहार

Spread the love

बोपोडी येथील कृषी खात्याची ५ हेक्टर जमीन लाटली, तहसीलदार, दिग्विजय पाटीलसह ९ जणांवर गुन्हा दाखल

महाराष्ट्र न्युज नेटवर्क

पुणे : मुंढवा येथील जमिनीच्या गैरव्यवहारप्रकरणी बावधन पोलिस ठाण्यात गुन्हा दाखल झाल्यानंतर पार्थ पवार यांच्या ‘अमेडिया होल्डिंग्ज’ कंपनीचा आणखी एक जमीन गैरव्यवहार उघडकीस आला आहे. कृषी खात्याच्या मालकीची बोपोडी येथील ५ हेक्टर ३५ आर जमीन तहसीलदाराला हाताशी धरून तिचा अपहार करून खासगी व्यक्तींचा मालकीहक्क दर्शवून शासनाची फसवणूक केल्याप्रकरणी खडक पोलिस ठाण्यात गुन्हा दाखल करण्यात आला आहे.

मुंढवा येथील महार वतनाची जमीन बोटॅनिकल गार्डनच्या ताब्यात असताना ४० एकर जमिनीचा अपहार केल्याचा प्रकार नुकताच उघडकीस आला होता. याप्रकरणी मुद्रांक शुल्क बुडविल्याचा गुन्हा बावधन पोलिस ठाण्यात दाखल झाला.

त्यापाठोपाठ खडक पोलिस ठाण्यात शुक्रवारी पहाटे आणखी एक गुन्हा दाखल करण्यात आला आहे. यात ‘अमेडिया एंटरप्रायझेस एलएलपी’ कंपनी, दिग्विजय पाटील आणि शितल तेजवाणी यांचा सहभाग आहे.याबाबत नायब तहसीलदार प्रविणा शशिकांत बोर्डे (वय ५०) यांनी खडक पोलिस ठाण्यात फिर्याद दिली आहे.

त्यावरून पोलिसांनी तहसीलदार सूर्यकांत येवले, ‘व्हिजन प्रॉपर्टीज’तर्फे कुलमुखत्यार धारक राजेंद्र रामचंद्र विध्वंस, ऋषिकेश माधव विध्वंस, मंगल माधव विध्वंस (सर्व रा. इंद्रा मेमरीज, सकाळनगर, बाणेर रोड), विद्यानंद अविनाश पुराणिक (रा. नवीन फ्लासिया, इंदौर, मध्य प्रदेश), जयश्री संजय एकबोटे (रा. चित्रलेखा बिल्डिंग, कुलाबा, मुंबई), कुलमुखत्यार धारक शितल किसनचंद तेजवाणी आणि ‘अमेडिया एंटरप्रायझेस एलएलपी’चे संचालक दिग्विजय अमरसिंह पाटील यांच्यावर गुन्हा दाखल केला आहे. हा सर्व प्रकार खडकमाळ येथील मामलेदार कचेरीत १२ फेब्रुवारी २०२४ ते १ जुलै २०२५ या दरम्यान घडला आहे. ‘अमेडिया एंटरप्रायझेस’चे उपमुख्यमंत्री अजित पवार यांचे चिरंजीव पार्थ पवार हे मुख्य भागीदार आहेत.

पोलिसांनी दिलेल्या माहितीनुसार, फिर्यादी नायब तहसीलदार म्हणून उपविभागीय अधिकारी कार्यालयात कार्यरत आहेत. त्यांनी सरकारतर्फे प्राधिकृत अधिकारी म्हणून तक्रार दिली आहे. सूर्यकांत येवले तहसीलदार म्हणून पुणे शहर मामलेदार कचेरीत कार्यरत असताना, १२ फेब्रुवारी २०२४ ते १ जुलै २०२५ या कालावधीत आपल्या अधिकारपदाचा गैरवापर करून, शहरामध्ये ‘मुंबई कुल वहिवाट व शेतजमीन अधिनियम १९४८’ लागू नसतानाही बोपोडी येथील एकूण ५ हेक्टर ३५ आर जमीन जी १८८३ पासून कृषी विभागाच्या ताब्यात व वहिवाटीत आहे. त्या जमिनीचा अपहार करण्यात आला.

या जमिनीचे मालक व कब्जेदार हे कृषी विभागाचे नाव असल्याबाबत वरिष्ठ अधिकाऱ्यांनी स्पष्ट आदेश दिलेले असताना, या जमिनीचा अपहार करून ‘व्हिजन प्रॉपर्टीज’तर्फे अर्जदार हेमंत गवंडे आणि त्यांच्यावतीने राजेंद्र विध्वंस, ऋषिकेश विध्वंस, मंगल विध्वंस, विद्यानंद पुराणिक, जयश्री संजय एकबोटे, शितल तेजवाणी आणि दिग्विजय अमरसिंह पाटील यांच्याशी हातमिळवणी व संगनमत करून सरकारी मालमत्तेवर या व्यक्तींचा मालकीहक्क दाखविण्यात आला. अशा बेकायदेशीर आदेश व पत्र तयार करून शासनाची फसवणूक केल्याचे तक्रारीत म्हटले आहे. खडक पोलिस अधिक तपास करत आहेत.