१ कोटी २७ लाखांचे सर्व सोने फरासखाना पोलिसांनी केले हस्तगत
महाराष्ट्र न्युज नेटवर्क
पुणे : केवळ चार महिन्यांपूर्वी कामावर घेतलेल्या कामगाराने दुकानातील लॉकर उघडून त्यातील एक किलो वजनाची सोन्याची बिस्किटे चोरून फरार झाल्याची घटना घडली होती. फरासखाना पोलिसांनी साताीर्यापासून सोलापूर, विजापूर, विजयवाडापर्यंत शोध घेतल्यानंतर अखेर २९ ऑक्टोबर रोजी सांगली जिल्ह्यातील जत येथे त्याला अटक केली. त्याच्याकडून चोरलेले सर्व १ कोटी २७ लाख रुपयांचे सोने जप्त करण्यात यश आले आहे.
प्रथमेश गणेश मंडले (वय १८, रा. पाचेगाव, ता. सांगोला, जि. सोलापूर) असे या चोरट्याचे नाव आहे. सुहास सावंत (वय ३१, रा. शनिवार पेठ) यांनी विश्रामबाग पोलिसांकडे फिर्याद दिली आहे. सावंत यांची बुधवार पेठेमध्ये ‘प्रिसियस रिफायनरी’ नावाची सोने-चांदी शुद्ध करण्याची यंत्रणा आहे.
त्यांच्याकडे ७–८ वर्षांपासून तीन कामगार कार्यरत असून कामाचा भार वाढल्याने प्रथमेश मंडले याला चार महिन्यांपूर्वी कामावर ठेवण्यात आले होते. दुकानातील लॉकरमध्ये शुद्धतेसाठी ठेवलेली प्रत्येकी १०० ग्रॅम वजनाची १ किलो सोनेबिस्किटे होती.
१६ ऑक्टोबर रोजी सकाळी १० वाजता दुकान सुरु झाल्यानंतर सर्व जण कामात असताना दुपारी दीड वाजता प्रथमेश मंडले याने तब्येत बिघडल्याचे सांगत बाहेर गेला. बराच वेळ उलटल्यानंतरही तो परत न आल्याने व त्याचा मोबाईलही बंद असल्याने संशय निर्माण झाला.
दुकानदारांनी तपास केला असता लॉकर उघडा असल्याचे आणि एक किलो सोने गायब असल्याचे दिसून आले. त्यानेच चोरी केल्याची खात्री झाल्यानंतर त्यांनी पोलिसांकडे धाव घेत फिर्याद केली. गुन्ह्याच्या गांभीर्याचा विचार करून पोलीस उपायुक्त ऋषिकेश रावले यांनी वरिष्ठ पोलीस निरीक्षक उत्तम नामवाडे यांना विशेष तपासाचे निर्देश दिले.
पोलीस उपनिरीक्षक अरविंद शिंदे व पथकातील जवानांनी तांत्रिक माहिती, रहदारी, नातेवाईक संपर्क या सर्वांचा मागोवा घेत शोध सुरु केला. मंडलेने मोबाईल बंद ठेवत ठिकाणे वारंवार बदलत सातारा, सांगली, सोलापूर, कोल्हापूर, विजापूर, विजयवाडा या ठिकाणी पलायन केले होते. पोलीस पथकाने सलग पाठलाग करत अखेर सांगली जिल्ह्यातील जत येथे त्याला अटक केली.
त्याने सोने वेगवेगळ्या ठिकाणी लपवून ठेवले होते. पोलिसांनी त्याच्याकडून सर्व साहित्य हस्तगत केले. ही कामगिरी अपर पोलीस आयुक्त मनोज पाटील, पोलीस उपायुक्त ऋषिकेश रावले, सहायक पोलीस आयुक्त अनुजा देशमाने यांच्या मार्गदर्शनाखाली वरिष्ठ पोलीस निरीक्षक उत्तम नामवाडे यांच्या नेतृत्वाखाली सहायक पोलीस निरीक्षक वैभव गायकवाड, पोलीस उपनिरीक्षक अरविंद शिंदे, तसेच पोलिस कर्मचारी कृष्णा निढाळकर, महेबुब मोकाशी, नितीन तेलंगे, गजानन सोनुने, नितीन जाधव, चेतन होळकर, अर्जुन कुडाळकर, तानाजी नांगरे, महेश राठोड, प्रविण पासलकर, विशाल शिंदे, महेश पवार, शशिकांत ननावरे, सुमित खुट्टे, प्रशांत पालांडे व मनिषा पुकाळे यांनी पार पाडली.
Latest Articles
