येरवडा पोलिसांची कारवाई : कामराजनगर परिसरात पसरविली होती दहशत
महाराष्ट्र न्युज नेटवर्क
पुणे : एमपीडीए आणि मोक्का अंतर्गत कारवाई झाल्यानंतर जामिनावर बाहेर आलेल्या सराईत गुन्हेगाराने आपल्या साथीदारांसह येरवड्यातील कामराजनगर येथे जुन्या वैमनस्यातून वाहनांची तोडफोड करून तरुणावर वार करत दहशत पसरवल्यानंतर जवळपास दोन महिने फरार असलेल्या गुन्हेगाराला येरवडा पोलिसांनी अटक केली आहे.
समीर शब्बीर शेख (वय २७, रा. जयजवाननगर, येरवडा) असे अटक करण्यात आलेल्या आरोपीचे नाव आहे. याबाबत अनिस सिकंदर शेख (वय २८, रा. कामराजनगर, येरवडा) यांनी येरवडा पोलीस ठाण्यात फिर्याद दिली आहे. ही घटना ७ ऑक्टोबर रोजी रात्री घडली होती.
समीर शेख आणि त्याचे साथीदार झऊर शेख, आझाद अस्लम खान, मुस्ताफा बेपारी, साहिल नदियाल, सुलतान शेख आणि त्याचे दोन मित्र यांनी फिर्यादीस शिवीगाळ करून धमकी दिली. तसेच लोखंडी शस्त्राने मारण्याचा प्रयत्न केला व रिक्षा तसेच इतर वाहनांच्या काचा फोडून नुकसान केले.
हातातील धारदार शस्त्रे हवेत फिरवत “मी इथला भाई आहे” असे म्हणत आरडाओरडा करून वस्तीमध्ये दहशत माजविली होती. येरवडा पोलिसांनी गुन्हा दाखल करून त्याच्या काही साथीदारांना अटकही केली होती; मात्र समीर शेख हा फरार होता.
दरम्यान, येरवडा पोलीस ठाण्यातील पोलीस अंमलदार अमोल गायकवाड यांना बातमीदाराकडून माहिती मिळाली की समीर शेख हा लोहगाव भागातील पवार वस्ती येथील मित्राकडे येणार आहे. त्यानुसार पोलीस उपनिरीक्षक महेश फटांगरे आणि पोलीस अंमलदार पथकाने तेथे जाऊन सापळा रचला आणि समीर शेख याला ताब्यात घेतले. चौकशीत त्याने फिर्यादीबाबत जुन्या भांडणाच्या रागातून आणि स्वतःच्या नावाची दहशत निर्माण करण्यासाठी हा गुन्हा केल्याचे सांगितले.
ही कामगिरी अपर पोलीस आयुक्त मनोज पाटील, पोलीस उपायुक्त सोमय मुंडे, सहायक पोलीस आयुक्त प्रांजली सोनवणे, वरिष्ठ पोलीस निरीक्षक अंजुम बागवान, पोलीस निरीक्षक विजय ठकार यांच्या मार्गदर्शनाखाली पोलीस उपनिरीक्षक महेश फटांगरे, प्रदीप सुर्वे, पोलीस अंमलदार महेंद्र शिंदे, मुकुंद कोकणे, शैलेश वाबळे, बालाजी सोगे, भीमराव कांबळे, नटराज सुतार, अतुल जाधव, अक्षय शिंदे, अमोल गायकवाड आणि संदीप जायभाय यांनी केली आहे.
