बसचालकाला अटक; बसमालक, मोडक इंटरनॅशनल स्कूलचे संस्थापक व मुख्याध्यापिकांवर गुन्हा दाखल
महाराष्ट्र न्यूज नेटवर्क
पुणे : विद्यार्थी वाहतूक करणार्या बसच्या धडकेत ५ वर्षांच्या बालकाचा मृत्यू झाल्याची घटना हडपसर-सासवड रोडवरील उरुळी देवाची येथे घडली. धक्कादायक बाब म्हणजे ही बस चालविणाऱ्या चालकाकडे वाहन चालवण्याचा परवाना नसल्याचे निष्पन्न झाले आहे.
अशा प्रकारे विना परवाना बसचालकाला बस चालविण्यास परवानगी दिल्याप्रकरणी बस मालक तसेच मोडक इंटरनॅशनल स्कूलचे संस्थापक व मुख्याध्यापिका यांच्याविरुद्ध फुरसुंगी पोलिसांनी गुन्हा दाखल केला आहे.
साईनाथ तुळशीराम भंगारे (वय ५) असे मृत्युमुखी पडलेल्या बालकाचे नाव असून, अपघातात साईनाथची आई रेखा तुळशीराम भंगारे (वय २८, रा. गणराज हाइट्स, सावली होम सोसायटीजवळ, उरूळी देवाची, हडपसर-सासवड रस्ता) गंभीर जखमी झाल्या आहेत.
याबाबत रेखा भंगारे यांनी फुरसुंगी पोलीस ठाण्यात फिर्याद दिली आहे. याप्रकरणी विद्यार्थी वाहतूक करणाऱ्या बसचालक संस्कार अनिल भोसले (रा. पांडवनगर, वडकी, हडपसर-सासवड रोड) याच्याविरुद्ध गुन्हा दाखल करण्यात आला असून भोसले याला अटक करण्यात आली आहे.
तसेच मोडक इंटरनॅशनल स्कूलचे संस्थापक संजय वसंत मोडक, मुख्याध्यापिका डॉ. आरती जाधव आणि बसमालक मनीषा संजय मोडक यांच्याविरुद्धही गुन्हा दाखल करण्यात आला आहे.
पोलिसांनी दिलेल्या माहितीनुसार, साईनाथ उरुळी देवाची परिसरातील एका शाळेत शिशूगटात शिक्षण घेत होता. मंगळवार, २ नोव्हेंबर रोजी सकाळी साडेसातच्या सुमारास रेखा मुलाला शाळेत सोडण्यासाठी घेऊन निघाल्या असताना, धनगरवस्तीकडे जाणाऱ्या रस्त्यावर पाठीमागून भरधाव वेगात आलेल्या विद्यार्थी वाहतूक करणाऱ्या बसने रेखा आणि साईनाथ यांना जोरदार धडक दिली.
बसच्या चाकाखाली सापडल्याने साईनाथ गंभीर जखमी झाला तर रेखा जखमी झाल्या. नागरिकांनी दोघांना तातडीने खासगी रुग्णालयात दाखल केले. मात्र उपचारापूर्वीच साईनाथचा मृत्यू झाल्याचे डॉक्टरांनी सांगितले.
