लाच लुचपत प्रतिबंधक विभागाची भोरमध्ये कारवाई : माती वाहतूकीची परवाना असताना मागितली होती लाच
महाराष्ट्र न्युज नेटवर्क
पुणे : माती वाहतूकीचा परवाना घेतला असतानाही दीड लाख रुपयांची लाच मागून १ लाख रुपयांची लाच स्वीकारताना भोर येथील मंडळ अधिकार्याला लाचलुचपत प्रतिबंधक विभागाने सापळा रचून अटक केली.
रुपाली अरुण गायकवाड (वय ४०, रा. संघवी लक्ष्मी विलास, वेताळ पेठ, भोर) असे या मंडळ अधिकार्याचे नाव असून त्या भोर तालुक्यातील निगुडघर मंडळ येथे कार्यरत आहेत. तक्रारदार यांनी भोर तहसीलदार यांच्याकडून १९ नोव्हेंबर ते १० डिसेंबर या कालावधीकरीता २०० ब्रास माती वाहतूकीचा परवाना घेतला आहे. त्यासाठी त्यांनी १ लाख २६ हजार २३० रुपयांची रॉयल्टी भोर तहसील कार्यालयात भरली आहे.
तक्रारदार ज्या भागातून माती उचलत आहेत, त्या मंडळाच्या मंडळ अधिकारी रुपाली गायकवाड आहेत. गायकवाड यांनी ३० नोव्हेंबर रोजी परवान्यात नमूद असलेल्या गाड्यांमधून माती वाहतूक सुरू असताना त्या गाड्या अडवून, यापुढे माती वाहतूक सुरू ठेवण्यासाठी तसेच तक्रारदाराच्या व्यवसायास सहकार्य करण्यासाठी दीड लाख रुपयांची मागणी केली.
पैसे दिल्याशिवाय माती वाहतूक बंद ठेवण्याची धमकी देत पकडलेल्या गाड्या सोडून दिल्या. त्यानंतर गायकवाड या तक्रारदारास वारंवार त्यांच्या कार्यालयात बोलावत असल्याने त्यांनी ३ डिसेंबर रोजी लाचलुचपत प्रतिबंधक विभागाकडे तक्रार दाखल केली.
या तक्रारीच्या अनुषंगाने ४ डिसेंबर रोजी लाच मागणीची पडताळणी करण्यात आली. यावेळी रुपाली गायकवाड यांनी तक्रारदारास भोर शहराबाहेर अभिजित मंगल कार्यालय येथे बोलावून तक्रारदार कायदेशीररित्या माती वाहतूक करत असलेल्या व्यवसायाला सहकार्य करण्याच्या मोबदल्यात १ लाख रुपयांची लाच मागितल्याचे निष्पन्न झाले.
त्यानंतर भोरेश्वर नगर रोडवरील अभिजित मंगल कार्यालयाजवळ सायंकाळी ५ वाजता पोलीस निरीक्षक सुहास हट्टेकर व त्यांच्या सहकाऱ्यांनी सापळा रचला. तक्रारदार यांच्याकडून १ लाख रुपयांची लाच स्वीकारताना गायकवाड यांना रंगेहाथ पकडण्यात आले. भोर पोलिस ठाण्यात गुन्हा दाखल करून त्यांना अटक करण्यात आली आहे.
ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील व अर्जुन भोसले यांच्या मार्गदर्शनाखाली करण्यात आली. पुढील तपास पोलीस निरीक्षक अविनाश घरबुडे करत आहेत.
