३० लाख घेताना ACB ने रंगेहाथ पकडले सोसायटीचा लिक्विडेटर, तात्कालीन प्रशासक ऑडिटरला
महाराष्ट्र न्युज नेटवर्क
पुणे : धनकवडी येथील एकता सोसायटीवर नेमलेल्या लिक्विडेटर आणि ऑडिटरने तब्बल ८ कोटी रुपयांची लाच मागितल्याचा धक्कादायक प्रकार समोर आला आहे. लाचलुचपत प्रतिबंधक विभागाने या ८ कोटींपैकी ३० लाख रुपयांचा पहिला हप्ता घेताना सापळा रचून अटक केली आहे.
लिक्विडेटर विनोद माणिकराव देशमुख (वय ५०, रा. सिंहगड दर्शन सोसायटी, वडगाव खुर्द, धायरी फाटा) आणि ऑडिटर व तात्कालीन प्रशासक भास्कर राजाराम पोळ (वय ५६, रा. सुश्रुत रेसिडेन्सी, गजानन महाराज मंदिराजवळ, नर्हे गाव) अशी अटक केलेल्या आरोपींची नावे आहेत. ही कारवाई तक्रारदार यांच्या शनिवार पेठेतील कार्यालयासमोर ५ डिसेंबर २०२५ रोजी सायंकाळी ७ वाजता करण्यात आली.
तक्रारदार हे धनकवडी येथील एकता सहकारी सोसायटीचे नवीन सभासद आहेत. तक्रारदारांसोबत इतर ३२ नवीन सभासद आहेत. त्यांनी २००५ मध्ये जुन्या सभासदांकडून एकता सहकारी सोसायटीचे शेअर विकत घेऊन नवीन सभासदत्व घेतले होते. परंतु, २०२० मध्ये मुळ सभासद आणि नवीन सभासद यांच्यात सभासदत्वावरून वाद निर्माण झाला. हा वाद सहकार विभागाकडे गेला. सहकार विभागाने या सोसायटीवर प्रशासक नेमले.
प्रशासकाने मुळ व नवीन सभासदांकडून चौकशी करून एक अहवाल सहकार विभागाकडे सादर केला. त्या अहवालानुसार सहकार विभागाने ती सोसायटी लिक्विडेशनमध्ये काढल्याचे जाहीर केले. सहकार विभागाकडून या सोसायटीवर २०२४ मध्ये विनोद देशमुख यांची लिक्विडेटर म्हणून नेमणूक करण्यात आली.
तक्रारदार व इतर ३२ नवीन सभासदांनी २०२३ मध्ये त्यावेळी प्रशासक असलेल्या ऑडिटर भास्कर पोळ यांच्या नावे अर्ज करून शेअर सर्टिफिकेट मिळावेत, अशी विनंती केली होती. भास्कर पोळ यांनी त्या अर्जांवर कार्यवाही करत इतर ३२ नवीन सभासदांचे अर्ज निकाली काढले. मात्र, तक्रारदार हे सुनावणीसाठी उपलब्ध नसल्याने त्यांचा अर्ज प्रलंबित ठेवण्यात आला.
सप्टेंबर २०२५ मध्ये तक्रारदार आपल्या विनंती अर्जाबाबत भास्कर पोळ यांच्याकडे चौकशी करण्यास गेले. त्यावेळी पोळ यांनी तक्रारदार व इतर ३२ सभासदांना शेअर सर्टिफिकेट मिळवून देण्यासाठी स्वत:साठी व सध्या लिक्विडेटर म्हणून कार्यरत असलेल्या विनोद देशमुख यांच्यासाठी ३ कोटी रुपयांची लाच मागितली.
तसेच, भविष्यातील लिलाव प्रक्रियेत या सहकारी सोसायटीची जागा तक्रारदार सांगतील त्या व्यक्तीला देण्यासाठी ५ कोटी रुपये मागितले. अशा प्रकारे एकूण ८ कोटी रुपयांची लाच मागण्यात आली. याबाबत तक्रारदारांनी ५ डिसेंबर रोजी ACB कडे तक्रार केली.
या तक्रारीची पडताळणी ५ डिसेंबर रोजीच करण्यात आली. त्यात भास्कर पोळ यांनी तक्रारदाराचे काम करून देण्यासाठी स्वत:साठी व लिक्विडेटर देशमुख यांच्यासाठी ३ कोटी रुपये आणि लिलाव टेंडर प्रक्रियेत तक्रारदार सांगतील त्या व्यक्तीस टेंडर देण्यासाठी ५ कोटी रुपये, असे एकूण ८ कोटी रुपयांची लाच मागितल्याचे निष्पन्न झाले. त्यासाठी त्यांनी एडव्हान्स म्हणून ३० लाख रुपये मागितले होते.
त्यानंतर सापळा रचण्यात आला. लिक्विडेटर विनोद देशमुख हे तक्रारदार यांच्या शनिवार पेठेतील कार्यालयासमोर आले. तक्रारदाराकडून लाचेबाबत सकारात्मक बोलणी करून, त्यांच्या कामासाठी एडव्हान्स म्हणून ३० लाख रुपयांची लाच स्वीकारताना विनोद देशमुख आणि भास्कर पोळ यांना ACB पथकाने रंगेहाथ पकडले.
त्यांच्याविरुद्ध विश्रामबाग पोलीस ठाण्यात गुन्हा दाखल करून अटक करण्यात आली आहे. ही कारवाई पोलीस अधीक्षक शिरीष सरदेशपांडे, अपर पोलीस अधीक्षक अजित पाटील, अर्जुन भोसले यांच्या मार्गदर्शनाखाली सहायक पोलीस आयुक्त निता मिसाळ व त्यांच्या सहकाऱ्यांनी केली. पोलीस निरीक्षक प्रविण निंबाळकर पुढील तपास करीत आहेत.
सर्वाधिक लाच मागण्याचा प्रकार
८ कोटी रुपयांची लाच मागण्याचा हा राज्यातील सर्वाधिक लाच मागण्याचा पहिलाच प्रकार असावा. विशेष म्हणजे ५ डिसेंबरला आलेल्या या लाचेच्या तक्रारीवर त्याच दिवशी पडताळणी करण्यात आली. त्यानंतर ५ डिसेंबरलाच सायंकाळी प्रत्यक्ष लाच घेताना दोघांना पकडण्यात आले.
