पोलीस आयुक्त अमितेशकुमार यांची एमपीडीएअंतर्गत कारवाई : समर्थ पोलीस ठाण्याची सहावी कारवाई
महाराष्ट्र न्युज नेटवर्क
पुणे : नाना पेठ परिसरात शस्त्र बाळगून खंडणी उकळणे, मारामाऱ्या करणे आणि दहशत निर्माण करणाऱ्या सराईत गुन्हेगारावर पोलीस आयुक्त अमितेश कुमार यांनी एमपीडीए कायद्यान्वये कारवाई करून त्याला नागपूर कारागृहात स्थानबद्ध केले आहे.
अमन इब्राहिम खान (वय २३, रा. सत्तार खान चाळ, नाना पेठ) असे या गुन्हेगाराचे नाव आहे. या वर्षभरात समर्थ पोलीस ठाण्याच्या हद्दीतल्या ६ सराईत गुन्हेगारांना स्थानबद्ध करण्यात आले आहे. अमन खान याच्यावर शस्त्र बाळगणे, खंडणी उकळणे आणि मारामाऱ्या करणे अशा चार गंभीर गुन्ह्यांची नोंद आहे.
ईद निमित्त गोव्याला जाण्यासाठी दुकानदारांना धमकावून खंडणी उकळल्याप्रकरणी समर्थ पोलिसांनी अमन खानसह चौघांना दोन वर्षांपूर्वी अटक केली होती. त्याची दहशत असल्याने नागरिक उघडपणे तक्रार देण्यास पुढे येत नव्हते. त्याच्यावर प्रतिबंधात्मक कारवाई केल्यानंतरही त्याच्यात सुधारणा होत नव्हती.
समर्थ पोलीस ठाण्याचे वरिष्ठ पोलीस निरीक्षक उमेश गित्ते यांनी एमपीडीएअंतर्गत कारवाई करण्याचा प्रस्ताव पोलीस आयुक्त अमितेश कुमार यांना सादर केला होता. या प्रस्तावाला मंजुरी देत पोलीस आयुक्तांनी त्याला नागपूर मध्यवर्ती कारागृहात एक वर्षासाठी स्थानबद्ध करण्याचा आदेश दिला. समर्थ पोलिसांनी त्याला ताब्यात घेऊन नागपूर कारागृहात रवानगी केली.
ही कारवाई पोलीस आयुक्त अमितेश कुमार, सहपोलीस आयुक्त रंजनकुमार शर्मा, अपर पोलीस आयुक्त राजेश बनसोडे, पोलीस उपायुक्त कृषिकेश रावले आणि सहाय्यक पोलीस आयुक्त अनुजा देशमाने यांच्या मार्गदर्शनाखाली वरिष्ठ पोलीस निरीक्षक उमेश गित्ते, पोलीस निरीक्षक चेतन मोरे, पोलीस हवालदार प्रसाद दोड्यानूर, जोरकर आणि बेडदूर यांनी केली.
